दिक्तेलमा ‘शून्यदेखि शिखरसम्म’ सडक नाटक तीन दिन प्रदर्शन हुँदै

मंसिर २, सोलुखुम्बु । खोटाङको सदरमुकाम दिक्तेलमा ‘शून्यदेखि शिखरसम्म’ सडक नाटक तीन दिन प्रदर्शन हुने भएको छ । ब्रह्माकुमारी राजयोग उप–सेवा केन्द्रको आयोजनामा आत्महत्या न्यूनीकरण तथा मानसिक स्वास्थ्य सचेतनामूलक सडक नाटक हुने भएको हो ।

सडक नाटक मंसिर ४, ५ र ६ गते दिक्तेलका विभिन्न स्थानमा प्रदर्शन हुने आयोजकले जनाएको छ । मानसिक स्वास्थ्यप्रति जनचेतना फैलाउने तथा आत्महत्या रोकथाममा सहयोग गर्ने उद्देश्यसहित नाटक विद्यालय र सार्वजनिक स्थलमा देखाइनेछ । कार्यक्रम संयोजक सन्जय कुमार राईका अनुसार नाटक मंसिर ४ गते समाविमा बिहान ११ बजे, माउन्ट एभरेष्टमा दिउँसो १ बजे र पञ्च मावि, दिक्तेलमा दिउँसो ३ बजे प्रदर्शन हुनेछ ।

मंसिर ५ गते दिक्तेल बहुमुखी क्याम्पसमा बिहान ७ः३० बजे, जिल्ला समन्वय कार्यालय अगाडि दिउँसो ११ बजे र दिक्तेल बोर्डिङ स्कुलमा दिउँसो १ बजे नाटक प्रस्तुत हुनेछ । कार्यक्रमको अन्तिम दिन मंसिर ६ गते दिक्तेल हाटडाँडामा बिहान ७ बजे प्रदर्शन गरिनेछ ।

कलाकार सुजन आचार्यको लेखन तथा निर्देशनमा तयार गरिएको नाटकमा सन्तोस गिरी, सुनिल गिरी, आकृति भुजेल, सोनाम हाङ राई, ललिजन राई, गुरास आचार्य, मनसुना आचार्य, कमल पाण्डे, शुशिल भट्टराई, मनिस कठेत, भिषण कार्की र समिक्षा कट्वाललगायत कलाकारहरूको अभिनय रहनेछ ।