मंसिर २, सोलुखुम्बु । सोलु हाईड्रोपावरको शेयरबारे अति प्रभावित क्षेत्रका तर्फबाट तिङ्लावासीले नेपाल धितोपत्र बोर्ड र सोलु हाईड्रोपावरको केन्द्रीय कार्यालय काठमाडौंमा ध्यानाकर्षण पत्र बुझाएका छन् । सोलु हाईड्रोपावर लिमिटेडले मंसिर ७ देखि २१ गतेसम्म अति प्रभावितका लागि ४० लाख र प्रभावितका लागि ६० लाख कित्ता सेयर निष्कासन गर्ने सूचना जारी गरेपछि मंगलबार स्थानीय तिङ्लावासीले औपचारिक ध्यानाकर्षण पत्र बुझाएका हुन् ।
स्थानीय बाबुराम कार्कीले जानकारी दिए अनुसार, नेपाल सरकारको वातावरणीय प्रभाव मूल्यांकन (इआइए) मा अति प्रभावित वा प्रभावित भनी सूचिकृत नभएका अन्य स्थानीय तह र समुदायहरूले आफूहरू पनि प्रभावित भएको दाबी गर्दै शेयरमा समान हक माग गर्न थालेपछि तिङ्लावासीले आफ्नो हक खोसिने खतरा देखेर ध्यानाकर्षण पत्र बुझाएको हो । ध्यानाकर्षण पत्रमा उल्लेख भएअनुसार, आयोजनाको हेडवोक्सदेखि पावरहाउससम्मको सम्पूर्ण संरचना तिङ्ला वडाभित्र पर्ने, आयोजनाका कारण आर्थिक, सामाजिक, भौतिक तथा जैविक क्षेत्रमा सबैभन्दा ठूलो असर यही वडाले व्यहोरेको तथा इआइए प्रक्रियाबाटै यस वडालाई अति प्रभावित क्षेत्रको रूपमा औपचारिक रूपमा मान्यता प्राप्त भएको स्मरण गराइएको छ ।
साथै, तिङ्लावासीले आयोजनाको हितका लागि विभिन्न चरणमा परेका प्राविधिक तथा जैविक कठिनाइ पनि धान्दै स्थानीय सहयोग गर्दै आएको तर अहिले अन्य स्थानीय तह र समूहले अनावश्यक दबाब सिर्जना गर्दै अति प्रभावितका हकमा प्रस्तावित शेयरमाथि धावा बोल्न खोजेको आरोप लगाएका छन् । तिङ्ला वडाले प्रभावितका लागि छुट्याइएका ६० लाख कित्ता शेयरमा आपत्ति नरहेको तर अति प्रभावितका हकमा तोकिएको ४० लाख कित्ता शेयरमा कुनै अवरोध स्वीकार्य नहुने चेतावनी दिएको छ ।
यदि अति प्रभावित वडाका जनताको हकविपरीत कुनै निर्णय गरियो भने तिङ्लावासी बाध्य भएर प्रतिकारमा उभिनुपर्ने उल्लेख पनि पत्रमा गरिएको छ । सोलु हाईड्रोपावरको केन्द्रीय कार्यालयले ध्यानाकर्षण पत्र बुझ्दा संचालक समितिमा यो विषय उठाइने आश्वासन दिएको छ भने नेपाल धितोपत्र बोर्डले निति परिवर्तन नगर्ने प्रतिकृया दिएको स्थानीय कार्कीले जानकारी दिनुभयो ।
Discussion about this post