सोरुङमा अवस्थित महादेव थानमा कक्षा ११–१२ का विद्यार्थीद्वारा सरसफाइ

मंसिर ३, सोलुखुम्बु । परम्पराअनुसार प्रत्येक वर्ष झैँ मंगलबार जनता कालिका माध्यमिक विद्यालय, कटारी–१०, सोरुङ छबिसेका कक्षा ११ र १२ का विद्यार्थीहरूले सोरुङ्गस्थित महादेव थान परिसरमा बाला चतुर्दशीको अवसरमा सरसफाइ कार्य सम्पन्न गरेका छन् ।

धार्मिक तथा सांस्कृतिक महत्वका कारण सो मन्दिरमा कटारी नगरपालिका र ताप्ली गाउँपालिकाका विभिन्न स्थानबाट दर्शनार्थीहरूको भीड लाग्ने गरेको शिक्षक धनन्जय श्रेष्ठले बताउनुभयो । उहाँका अनुसार विद्यार्थीहरूले सरसफाइ अभियानमा सक्रिय सहभागिता जनाएपछि मन्दिर परिसर थप व्यवस्थित र आकर्षक देखिएको छ ।

विद्यालयका अनुसार शैक्षिक गतिविधिसँगै विद्यार्थीहरूलाई सामाजिक सेवामा पनि प्रवृत्त गराउने उद्देश्यले यस्तो कार्यक्रम नियमित रूपमा सञ्चालन गरिँदै आएको छ । सरसफाइ अभियानमार्फत विद्यार्थीहरूले समुदायप्रति जिम्मेवारी र सामूहिक कार्यको महत्व बुझ्ने अवसर पाउने विद्यालय प्रशासनको भनाइ छ। स्थानीयवासीले पनि विद्यार्थीहरूको सक्रियता र योगदानप्रति खुसी व्यक्त गरेका छन् ।