लिम्चुङ्बुङ–५ गाउँपालिकाकै पहिलो बालमैत्री वडा घोषणा हुँदै

मंसिर ३, सोलुखुम्बु । उदयपुरको लिम्चुङ्बुङ गाउँपालिका–५ भोलि (बिहीबार) औपचारिक रूपमा गाउँपालिकाकै पहिलो बालमैत्री वडा घोषणा हुन लागेको छ । वडालाई बालश्रममुक्त, हिंसारहित, बालविवाह निषेधित तथा बालमैत्री स्थानीय शासनयुक्त वडा बनाउने आवश्यक मापदण्डहरू पूरा भएपछि घोषणा प्रक्रिया अगाडि बढाइएको हो ।

बालमैत्री स्थानीय शासनका फोकल पर्सन मिलन परियारका अनुसार सरकारले तयार पारेको बालमैत्री स्थानीय शासन कार्यान्वयन निर्देशिका–२०७८ ले तोकेको ५१ सूचकहरूमध्ये अधिकांश सूचक पूरा भएपछि वडालाई बालमैत्री घोषणा गर्न लागिएको हो । घोषणा कार्यक्रममा गाउँपालिका अध्यक्ष मेजर कुमार राई प्रमुख अतिथि रहनेछन् ।

त्यसैगरी एक वर्षभित्रका बालबालिकालाई पूर्णखोप, सबै घरपरिवारमा आयोडिनयुक्त नुन, कमतौल, पुड्को र ख्याउटेपन हुने बालबालिकाको सङ्ख्यामा कमी हुनुपर्ने, सबै घरधुरीमा खानेपानी, शौचालय, अनिवार्य जन्मदर्ता, बालविवाह मुक्त क्षेत्र भएको हुनुपर्ने व्यवस्था छ ।

बालबालिकाविरुद्ध हुने हिंसा, बेचबिखन, शोषण, दुव्र्यवहारमा कमी आएको हुनुपर्ने निर्देशिकामा व्यवस्था छ । त्यस्तै, छाउपडी, कमलरीजस्ता सामाजिक कुप्रथाको अन्त्य, सबै बालबालिका विद्यालय गएको हुनुपर्ने, सडक बालबालिका शून्य, बालसञ्जाल गठन, प्रत्येक विद्यालयमा खानेपानीको सुविधासहित छात्रछात्राका लागि अलग–अलग शौचालयको व्यवस्था भएको हुनुपर्ने, विद्यालय व्यवस्थापन र स्वास्थ्य व्यवस्थापन समितिमा बाल क्लब सञ्जालको प्रतिनिधित्व भएको हुनुपर्ने व्यवस्था निर्देशिकाले गरेको छ ।