सोलुदुधकुण्ड–८ मा बिरामी अवस्थामा भेटिएका छत्र राईका आफन्त खोजिँदै

मंसिर ३, सोलुखुम्बु । सोलुखुम्बुको सोलुदुधकुण्ड नगरपालिका–८ मा एक नागरिक बिरामी अवस्थामा भेटिएपछि स्थानीयवासीहरूले उनका आफन्त सम्पर्कमा आउन आग्रह गरेका छन् ।

खोटाङको ऐसेलुखर्क गाउँपालिका, बाकाचोल स्थायी ठेगाना भएका छत्र राई करिब २३ वर्षदेखि सोलुदुधकुण्ड नगरपालिका–८ मा बस्दै आएका छन् । लामो समयदेखि त्यहीँ बसोबास गर्दै आए पनि उनको नियमित सम्पर्कमा रहने कुनै आफन्त नभएको स्थानीयले बताएका छन् । हाल उनी बिरामी अवस्थामा रहेको र उचित उपचार तथा हेरचाहका लागि आफन्तको उपस्थितिको अत्यावश्यकता देखिएको छ ।

उनीसँग नजिकबाट सम्पर्कमा रहेर सहयोग गर्दै आएका स्थानीय नवाङ गेल्जी शेर्पाका अनुसार, राईको उद्धार तथा उपचारका लागि पहल भइरहेको छ । शेर्पाले सकेसम्म छिटो उनका आफन्त वा चिनेजानेकाले सम्पर्क गर्न आग्रह गरेका छन्, ताकि आवश्यक उपचार र सहायताका उपाय प्रभावकारी रूपमा अगाडि बढाउन सकियोस् ।

स्थानीयवासी तथा सामाजिक अभियन्ताहरूले छत्र राईका आफन्तलाई खबर पुग्ने गरी यो जानकारी व्यापक रूपमा साझा गरिदिन सबैमा अनुरोध गरेका छन् ।