सोलुखुम्बुमा करिब ५१० के.जी. मह बिक्री

मंसिर ४, सोलुखुम्बु । हिमाली जिल्ला सोलुखुम्बुमा चालु आर्थिक वर्ष २०८२/०८३ को हालसम्म करिब ५१० के.जी. मह बिक्री भएको छ । जिल्लाका विभिन्न स्थानीय तहमा उत्पादन गरिएको उक्त मह बिक्री भएको कृषि ज्ञान केन्द्र सोलुखुम्बुले जनाएको छ ।

कृषि ज्ञान केन्द्रका सूचना अधिकारी उपेन्द्र ठाकुरका अनुसार मह प्रति के.जी. ३ हजार ५ सयदेखि ४ हजार रुपैयाँसम्ममा बिक्री भइरहेको छ । जिल्लाका आठ स्थानीय तहमध्ये थुलुङ दुधकोशी गाउँपालिका, माप्य दुधकोशी गाउँपालिका र सोताङ गाउँपालिकाबाट मात्र हालसम्मको उत्पादन तथा बिक्री सम्बन्धी तथ्यांक संकलन गरिएको छ ।

अन्य स्थानीय तहबाट विस्तृत विवरण आउन बाँकी रहेको सूचना अधिकारी ठाकुरले बताउनुभयो । जिल्लामा मुढे र आधुनिक दुवै प्रकारका मौरीघारबाट मह उत्पादन हुने गर्छ । यहाँ प्रायः सेरेना जातका मौरीमार्फत मह उत्पादन हुने गरिएको छ । उत्पादित अधिकांश मह स्थानीय बजारमै उपभोग हुने गरेको छ भने केही मात्रा काठमाडौँसहित बाहिरी बजारतर्फ पनि पठाइने गरिएको कृषि ज्ञान केन्द्रले जानकारी दिएको छ ।