खोटाङमा ‘शून्यदेखि शिखरसम्म’ सडक नाटकको प्रस्तुति

मंसिर ४, सोलुखुम्बु । खोटाङको सदरमुकाम दिक्तेलका तीन विद्यालयमा आज ‘शून्यदेखि शिखरसम्म’ नामक सडक नाटक मञ्चन गरिएको छ। आत्महत्या न्यूनीकरण तथा मानसिक स्वास्थ्य सचेतनामूलक उद्देश्यसहित प्रस्तुत गरिएको उक्त नाटक माउण्ट एभरेष्ट इङ्लिश बोर्डिङ स्कुल, पञ्च मावि र सरस्वती माविमा सम्पन्न भएको छ।

नाटक ब्रह्माकुमारी राजयोग उप–सेवा केन्द्रको आयोजनामा भएको हो। नाटक लेखन तथा निर्देशक सुजन आचर्यका अनुसार मंसिर ५ गते यस नाटक दिक्तेल बहुमुखी क्याम्पसमा बिहान ७ः३० बजे, जिल्ला समन्वय कार्यालय अगाडि दिउँसो ११ बजे र दिक्तेल बोर्डिङ स्कुलमा दिउँसो १ बजे प्रदर्शन गरिनेछ।

साथै, मंसिर ६ गते दिक्तेल हाटडाँडामा बिहान ७ बजे प्रदर्शन हुने कार्यक्रम संयोजक सञ्जय राईले जानकारी दिनुभयो । आजका प्रस्तुति पछि सहभागी विद्यार्थी, शिक्षक तथा अभिभावकहरूले नाटक समयानुकूल, आवश्यक र समुदायमा सकारात्मक प्रभाव पार्ने प्रतिक्रिया दिएका छन्। यस कार्यक्रमले विद्यालयदेखि समुदायसम्म मानसिक स्वास्थ्य र आत्महत्या न्यूनीकरणप्रति आवश्यक चेतना र संवाद सुरु गर्ने प्रभावकारी माध्यमको रूपमा ‘शून्यदेखि शिखरसम्म’लाई स्थापित गर्न सक्ने देखिएको छ।