लिम्चुङबुङ–५ मा वडा स्तरीय पुरुष तथा महिला भलिबल प्रतियोगिता सुरु

मंसिर ५, सोलुखुम्बु । उदयपुरको लिम्चुङबुङ गाउँपालिका–५, जाँतेमा वडा स्तरीय पुरुष तथा महिला भलिबल प्रतियोगिता सुरु भएको छ । लिम्चुङबुङ गाउँपालिका–५ जाँते खेलकुद विकास समितिको आयोजनामा उक्त प्रतियोगिता सुरु भएको हो ।

शुक्रबार प्रतियोगिताको उद्घाटन गाउँपालिका उपाध्यक्ष पुष्पलाल राईले गर्नुभएको छ । कार्यक्रम समितिका अध्यक्ष रमनसेर राईका अनुसार प्रतियोगितामा पुरुषतर्फ १० टिम र महिलातर्फ ५ टिमले सहभागिता जनाएका छन् । विजेता टिमलाई आकर्षक रकमसहित पुरस्कार वितरण गरिने आयोजकले जनाएको छ ।

पुरुष तथा महिला दुवै समूहमा पहिलो, दोस्रो र तेस्रो हुने टिमले क्रमशः १६ हजार, १२ हजार र ८ हजार रुपैयाँसहित ट्रफी, मेडल र प्रमाणपत्र प्राप्त गर्नेछन् । साथै प्रतियोगिताको उत्कृष्ट खेलाडीलाई पनि ट्रफी र प्रमाणपत्र प्रदान गरिनेछ । उद्घाटन कार्यक्रममा जाँतेका वडा अध्यक्ष कबिचन्द्र राईसहित स्थानीयबासिन्दाको उत्साहजनक उपस्थिति रहेको थियो । प्रतियोगिता सफलतापूर्वक सम्पन्न हुनेमा आयोजकले आशा व्यक्त गरेको छ ।