आफ्नै थातथलो फर्किनथाले खुम्बुबासी

मंसिर ५, सोलुखुम्बु । सोलुखुम्बुको खुम्बु पसाङल्हामु गाउँपालिकामा नागरिक बसाइसराई गरेर फर्किन थालेका छन् । विगत केही वर्षयता जिल्लाको माथिल्लो क्षेत्रका बासिन्दा आफ्नै थाकथलोमा फर्किन थालेका हुन् । हिमाली क्षेत्रमा जिवनयापन कठिनाई हुने निष्कर्ष सहित बाहिरिएका पालिका बासीहरु पछिल्लो केही वर्षयता खुम्बु फर्किन थालेको पाइएको हो ।

गाउँपालिकाको पञ्जिकरण शाखा प्रमुख डोल्मा शेर्पाका अनुसार आर्थिक वर्ष २०८१/०८२ मा कुल ११ घरधुरीका ३४ पालिकाबासी नागरिक गाउँपालिकामा फर्किएका छन् । यसो त जानेहरु पनि नभएका हैनन् । पालिबाबाट ९ घरधुरीका २१ जना मात्र अन्यत्र बसाई सरेका छन् । गाउँपालिकाका प्रमुख प्रशासनिक अधिकृत नवराज गौतमका अनुसार खुम्बु पासाङल्हमु गाउँपालिका विश्वकै सर्वोच्च शिखर सगरमाथाको फेदमा अवस्थित पर्यटकीय क्षेत्र भएकाले यहाँको जनसंख्या आवागमनमा पर्यटन क्षेत्रको प्रत्यक्ष प्रभाव परेको हो ।

उहाँका अनुसार, विगत तीन बर्ष देखि गाउँपालिकाले स्थानीयबासीहरुलाई १० लाख रुपौयाँ सामाजिक सुरक्षको व्यवस्था गरेको र ट्रेकिङ व्यवसाय तथा पर्यटक सेवा क्षेत्रमा संलग्न हुने व्यक्तिहरूले व्यवसायिक प्रयोजनका लागि पालिकाभित्र घरभाडामा लिएर बस्ने हुँदा फर्किनेको संख्या बढी देखिएको हो ।

२०७८ सालको जनगणना अनुसार यहाँको जनसंख्या ८ हजार ९ सय ८९ रहेको छ । खुम्बु क्षेत्र पर्यटकीय दृष्टिले अत्यन्तै महत्वपूर्ण गन्तव्यका रूपमा चिनिन्छ, जसले स्थानीय रोजगारी, व्यवसायिक अवसर र जनसंख्याको गतिशीलतामा प्रत्यक्ष प्रभाव पारेको देखिन्छ ।