थुलुङ दुधकोशीले गर्यो कृषक सम्मानित, कृषक भन्छन– उत्साहका साथ कृषि पेसामा लाग्छौँ

मंसिर ५, सोलुखुम्बु । सोलुखुम्बुको थुलुङदुधकोशी गाउँपालिकामा आयोजित सातौँ अध्यक्ष रनिङशिल्ड तथा पालिका महोत्सव अन्तरगत कृषि मेला–प्रदर्शनीमा उत्कृष्ट कृषक तथा समूहहरूलाई सम्मान गरिएको छ । सम्मानित कृषकहरूले कृषि पेशाप्रति थप उत्साह उत्पन्न भएको बताउँदै अझै आधुनिक र व्यावसायिक खेतीतर्फ उन्मुख हुने प्रतिबद्धता व्यक्त गरेका छन् ।

खाद्यान्न, दलहन र तेलहन समूहतर्फ पहिलो, दोस्रो, तेस्रो र सान्त्वना स्थान क्रमशः टुण्डुमान राई, रत्न चाम्लिङ, कविता बि.क. र आसबहादुर राईले हात पारे । फलफूल बालीतर्फ ज्ञानप्रसाद राई पहिलो, सम्पुरे तामाङ दोस्रो, गोपाल राई तेस्रो तथा रामबहादुर गुरुङ र धनकुमार राईले सान्त्वना प्राप्त गरे।

त्यसैगरी तरकारी तथा मसला बालीतर्फ युवराज राई पहिलो, अमर राई दोस्रो, हर्कमान बि.क. तेस्रो र एकबहादुर बानिया सान्त्वना स्थानमा परेका छन्। हस्तकला समूहमा इकिमा अर्गानिक होमस्टेले पहिलो, डिल्लीशेर राईले दोस्रो तथा तेस्रो स्थान हासिल गरेका छन्। नगदे तथा जडीबुटी बालीतर्फ मिसन बाबु राई, धनबहादुर थापा, युवराज राई र डिल्लीराम राई क्रमशः प्रथम, द्वितीय, तृतीय तथा सान्त्वना विजेता बने।

थुलुङ दुधकोशी गाउँपालिकाका बाली विकास अधिकृत डिल्लुनाथ योगीका अनुसार सबै विधाका विजेता, उपविजेता, तेस्रो र सान्त्वना विजेताहरूलाई २५ प्रतिशत कर कट्टी सहित क्रमशः ५ हजार ५ सय, ४ हजार, २ हजार र १५ सय रूपैयाँ पुरस्कार प्रदान गरिएको छ ।

गाउँपालिकाको केन्द्र मुक्लीमा सुरु भएको महोत्सवमा रनिङशिल्ड भलिबल, कृषि मेला–प्रदर्शनी, स्थानीय खानाहरूको स्टल तथा सांस्कृतिक कार्यक्रम प्रमुख आकर्षणका रूपमा रहेका छन् । तीन दिनसम्म चल्ने महोत्सवको उद्घाटन गाउँपालिका अध्यक्ष असिम राई र जिल्ला समन्वय समिति प्रमुख कृष्णप्रसाद निरौलाले संयुक्त रूपमा गरेका हुन् । कार्यक्रममा प्रमुख जिल्ला अधिकारी देवी पाण्डे खत्रीसहित विभिन्न कार्यालयका प्रमुख तथा निर्वाचित जनप्रतिनिधिहरूको सहभागिता रहेको थियो ।