सोलुदुधकुण्डले वडामै पुगेर योजना सम्झौता गर्यो, नागरिकलाई समय–खर्च दुबैमा राहत

मंसिर ६, सोलुखुम्बु । सोलुखुम्बुको सोलुदुधकुण्ड नगरपालिकाले आर्थिक वर्ष २०८२/०८३ का विकास योजनाहरूका लागि आवश्यक सम्झौता प्रक्रियालाई यस वर्ष पनि वडामै पुगेर सम्पन्न गरेको छ । नगरवासीलाई सम्झौता गर्न नगरपालिकासम्म आउनु पर्ने झन्झट कम गर्नका लागि सुरु गरिएको यो अभ्यास विगतका वर्षदेखि निरन्तर अवलम्बन हुँदै आएको हो ।

यसै क्रममा सोलुदुधकुण्ड–१०, टाप्टिङमा शुक्रबार आयोजित योजना अभिमुखीकरण तथा योजना सम्झौता कार्यक्रममा वडा सदस्य, उपभोक्ता समिति, स्थानीय प्रतिनिधि तथा विभिन्न शाखाका प्रमुखहरूको सक्रिय सहभागिता देखिएको थियो । कार्यक्रमलाई सम्बोधन गर्दै योजना शाखा प्रमुख रामकुमार खड्काले योजनाहरू गुणस्तरीय, पारदर्शी र समयमै सम्पन्न गर्नु नगरको प्राथमिकता भएको उल्लेख गर्नुभयो ।

उहाँले स्थानीय श्रमदानको महत्व बढिरहेको बताउँदै यसले विकास निर्माणलाई प्रभावकारी, पारदर्शी र सामुदायिक स्वामित्वयुक्त बनाउन सहयोग गर्ने धारणा राख्नुभयो । सबै योजनाहरू प्राविधिक स्टामेटअनुसार उच्च गुणस्तरमा सम्पन्न गरिनुपर्ने पनि उहाँले जोड दिनुभयो । उपभोक्ता समिति, जनप्रतिनिधि र कर्मचारी एकै टिम भएर काम गर्न सके उत्कृष्ट परिणाम प्राप्त हुने विश्वास व्यक्त गर्दै खड्काले स्थानीय स्तरमै सहकार्य र जवाफदेहिता सुनिश्चित गर्नुपर्नेमा जोड दिनुभयो ।

योजना शाखाका अनुसार हालसम्म शिक्षा, स्वास्थ्य, खानेपानी तथा पुल–सडकसँग सम्बन्धित सातवटा योजनाको सम्झौता भइसकेको छ । केही योजनाहरू भने विभिन्न कारणले सम्झौता प्रक्रियामा नआएकाले ती योजनाको प्रक्रिया नगरपालिकामै सहजीकरण गरिने जनाइएको छ।नगरपालिकाका अनुसार वडामै पुगेर योजना सम्झौता गर्ने अभ्यासले नागरिकलाई अनावश्यक समय र खर्चबाट बचाउनुका साथै स्थानीय तहमा पारदर्शिता, जनसहभागिता र सेवाप्रवाहको पहुँच उल्लेखनीय रूपमा बढाएको छ ।