सोताङमा पञ्चकन्या कालिका मन्दिर विवाद अन्त्य, परम्परागत पूजा यथावत् रहने

मंसिर ६, सोलुखुम्बु । सोलुखुम्बुको सोताङ गाउँपालिका–१ र ३ को सीमामा अवस्थित पञ्चकन्या कालिका देवी मन्दिरसम्बन्धी स्थानीय समुदायमा उत्पन्न भएको अन्योल अन्त्य भएको छ । पालिकाले शुक्रबार एक वज्ञप्ति जारी गर्दै मन्दिरलाई आफ्नै मातहतमा ल्याउने कुनै योजना नरहेको स्पष्ट पारेसँगै उक्त विवादको अन्त्य भएको हो । साथै परम्परागत पूजा–पद्धतिको निरन्तरता र संरक्षणप्रति स्थानीय सरकार हालसम्मकै प्रतिबद्ध रहेको जनाएको छ ।

१६औँ शताब्दीदेखि धार्मिक आस्थाको प्रमुख केन्द्र मानिँदै आएको पञ्चकन्या कालिका मन्दिरबारे पछिल्ला दिनहरू केही हल्ला–अफवाह फैलिन थालेपछि गाउँपालिकाले स्थानीयवासीलाई आश्वस्त बनाउँदै मन्दिर, परम्परा र पुजारिप्रतिको सम्मानलाई उच्च प्राथमिकतामा राखिएको जानकारी दिएको हो । जारी विज्ञप्तिमा पालिकाले मन्दिरप्रति जनताको गहिरो आस्था, दीर्घकालीन परम्परा तथा वर्षौंदेखि पूजा–अर्चना गर्दै आएका पुजारीहरूको भूमिकाप्रति पूर्ण सम्मान व्यक्त गर्दै “संरक्षण, संवद्र्धन र प्रवद्र्धन स्थानीय सरकारको निरन्तर दायित्व” रहेको उल्लेख गरेको छ ।

आगामी पञ्चमी पर्वलाई लक्षित गर्दै पूजा अवरोधविना सञ्चालन गर्न हालसम्म सेवा प्रदान गर्दै आएका पुजारीहरूलाई निरन्तरतापूर्वक व्यवस्थापनमा सहभागी हुन पालिकाले अनुरोध गरेको छ। त्यस्तै, पञ्चकन्या कालिका भगवती गुठ तथा सहयोग समितिलाई आवश्यक तयारी तथा सहयोगी कार्य अगाडि बढाउन आग्रह गरिएको छ ।

गएको कात्तिक ३० गते बसेको पालिका बैठकको निर्णयअनुसार सबै पुजारी, गुठ–समिति पदाधिकारी तथा सदस्यहरूलाई लिखित आमन्त्रण गरिएको थियो। सोअनुसार मंसिर ५ गते मन्दिर परिसरमै पालिका अध्यक्ष, पुजारीहरू, राजनीतिक दलका प्रतिनिधिहरू, सरोकारवाला, कर्मचारी, सुरक्षाकर्मी तथा स्थानीय जनताको उपस्थितिमा विस्तृत छलफल तथा समन्वय बैठक सम्पन्न भएको पालिकाले जनाएको छ ।