नेचासल्यान १ को वडा कार्यालय भवन उद्घाटन, वडाबासीले प्रभावकारी सेवा पाउनेमा विश्वास 

धनकुमार ढुङ्गेल, कार्तिक ६ । सोलुखुम्बुको नेचासल्यान गाउँपालिका वडा नम्बर १ को प्रशासनीक भवनको उद्घाटन गरिएको छ ।  वडा अध्यक्ष रमेश कुमार राईको सभापतित्व तथा जिल्ला समन्य समिति सोलुखुम्बुका प्रमुख कृष्ण प्रसाद निरौलाको प्रमुख आतिथ्यतामा सम्पन्न एक कार्यक्रमका बीच वडाको प्रशासनिक भवन उद्घाटन गरिएको हो ।

जिल्ला समन्वय समितिको ६० प्रतिशत र गाउँपालिकाको ४० प्रतिशत लागत साझेदारीमा निर्मित भवनको उद्‌घाटन गाउँपालिकाका अध्यक्ष, उपाध्यक्ष, छिमेकी गाउँपालिकाका प्रमुख तथा प्रतिनिधिको उपस्थितिमा गरिएको हो ।  भवन उद्‌घाटन कार्यक्रमका प्रमुख अतिथि एवं जिल्ला समन्वय समितिका प्रमुख निरौलाले राज्यका तिनै तहका निकायको आपसी साझेदारीमा काम गर्न सके नागरिकले विकास निर्माणको अनुभुति गर्न सक्ने उल्लेख गर्नुभयो ।

उहाँले वडा कार्यालय निर्माण सम्पन्न भएकाले वडा नम्बर १ का नागरिकले प्रभावकारी सेवा पाउनेमा विश्वास व्यक्त गर्नुभएको छ ।  यस्तै कार्यक्रममा बोल्दै नेचासल्यान गाउँपालिका अध्यक्ष धनजन राईले गाउँपालिका समग्र क्षेत्रको विकासमा तल्लीन रहेको उल्लेख गर्दै भौतिक विकास र मानवीय विकासलाई समान रुपले अगाढी बढाइरहेको बताउनुभयो ।  गाउँपालिकालाई सुशासन र भ्रष्टाचार नियन्त्रणमा अव्बल बनाउनेमा आफ्ना ध्यान रहेको उहाँको भनाई थियो ।  

यस्तै थुलुङ दुधकोशी गाउँपालिकाका अध्यक्ष असिम राईले स्थानीय सरकारलाई श्रोत साधन युक्त बनाएर सरकारको परिभाषा दिनुपर्ने उल्लेख गर्नुभएको थियो । उहाँले नागरिकले सरकार भएको महशुुस गर्नेगरी काम गर्नुपर्नेमा जोड दिँदै वडा कार्यालय भवन निर्माण भएकोमा बधाई व्यक्त गर्नुभयो । यस्तै नेचासल्यान गाउँपालिका उपाध्यक्ष विना राईले गाउँपालिकाबासीको न्याय, समानता र अधिकारका लागी आफूहरू लागी परिरहेको उल्लेख गर्नुभएको थियो ।  भवन उद्‌घाटन कार्यक्रममा महाकुलुङ गाउँपालिका उपाध्यक्ष विपना कुलुङ सहित, गाउँपालिका सम्पुर्ण वडाका अध्यक्षहरु, वडा सदस्इ, सरोकारवाला नागरिक र वडाबासीहरुको उल्लेख्य उपस्थीति रहेको थियो ।