सोलुदुधकुण्डमा मासु तथा अण्डा पसलको साता दिने अनुगमन सकियो, तीन व्यवसायी बिना दर्ता सञ्चालनमा

मंसिर ७, सोलुखुम्बु । सोलुदुधकुण्डमा मासु तथा अण्डा पसलको साता दिने अनुगमन सकिएको छ । सोलुदुधकुण्ड नगरपालिका पशु सेवा शाखा र नगर प्रहरीको संयुक्त टोलीद्वारा कार्तिक ३० गतेदेखि सल्लेरी, फाप्लु तथा नयाँबजार क्षेत्रका मासु तथा अण्डा पसलहरूमा निरन्तर गरिएको अनुगमन सम्पन्न भएको हो ।

“जनताको स्वास्थ्य हाम्रो पहिलो प्राथमिकताः स्वच्छ मासु, स्वच्छ अण्डा, स्वस्थ समुदाय” भन्ने मूल नारासहित सुरु गरिएको अनुगमन एक सातासम्म निरन्तर रुपमा सञ्चालन गरिएको थियो । अनुगमन टोलीका सदस्य पशु प्राविधिक गणेश थापाका अनुसार नागरिकले स्वच्छ, सुरक्षित तथा स्थानीय सरकारले तोकेको मापदण्डअनुसारको सेवा पाउनुपर्छ भन्ने उद्देश्यका साथ गरिएको यस अनुगमनले व्यवसायीहरूलाई अझ जिम्मेवार र सचेत बन्न प्रेरणा दिएको छ ।

आईतबार मात्रै गरिएको अनुगमनमा १२ वटा मासु पसल र २ वटा अण्डा डिलरको पसल जाँच गरिएको थियो । सो क्रममा तीन वटा मासु पसल दर्ता बिना नै सञ्चालन भइरहेको पाइएको छ । यस्तै १ केजी ३८ ग्राम बिग्रिएको मासु बरामद गरी नष्ट गरिएको अनुगमन टोलीले जनाएको छ ।

नगरपालिकाले हालसम्म जम्मा २९ वटा मासु पसलको अनुगमन गरिसकेको छ । उपभोक्ताको स्वास्थ्य सुरक्षालाई ध्यानमा राख्दै यस्ता अनुगमनहरू आगामी दिनमा अझ कडाइका साथ सञ्चालन गर्ने नगरपालिका पक्षले बताएको छ ।