खोटाङमा ‘शून्यदेखि शिखरसम्म’ सडक नाटकको आठौँ सो सम्पन्न, मानसिक स्वास्थ्यप्रति समुदायमा जागरण

मंसिर ७, खोटाङ । खोटाङमा पछिल्लो समय बढ्दै गएको आत्महत्याका घटनाप्रति पर्याप्त चासो नदेखिएको गुनासोसहित मानसिक स्वास्थ्यबारे समुदायमा संवाद सुरु गर्ने उद्देश्यले सञ्चालन गरिएको ‘शून्यदेखि शिखरसम्म’ सडक नाटक अभियान आठौँ सोसँगै सफलतापूर्वक समापन गरिएको छ। ब्रह्माकुमारी राजयोग उप–सेवा केन्द्रको आयोजनामा सञ्चालन भएको उक्त नाटक अभियान मंसिर ३ गते मझुवा कालिका भगवती मन्दिर परिसरबाट प्रारम्भ भएको थियो।

अभियानअन्तर्गत मंसिर ४ गते दिक्तेलका तीन विद्यालय समावि, माउण्ट एभरेष्ट इङ्लिस बोर्डिङ स्कुल र पञ्च माविमा नाटक मञ्चन गरिएको थियो। मंसिर ५ गते बिहान दिक्तेल बहुमुखी क्याम्पस र दिउँसो जिल्ला समन्वय कार्यालय अगाडि सो सम्पन्न गरिएको हो । यस्तै मंसिर ६ गते दिक्तेल साप्ताहिक बजार हाटडाँडामा सातौँ सो र मंसिर ७ गते दिक्तेल बोर्डिङ स्कुलमा गरिएको आठौँ सोसँगै अभियानलाई समापन गरिएको हो।

कठिनाइबीच पनि कार्यक्रम प्रभावकारी रूपमा सञ्चालन भएको सहजकर्ता अविन्द्र राईले जानकारी दिए। अभियानमा सञ्जय राईको नेतृत्व महत्वपूर्ण रहेको आयोजकहरूले बताएका छन्। उहाँको समन्वय र पहलका कारण विद्यालयदेखि समुदायसम्म मानसिक स्वास्थ्य सम्बन्धी संवाद विस्तार गर्न सहज भएको उनीहरूको भनाइ छ। नाटकका लेखक तथा निर्देशक सुजन आचार्य रहेका छन्।

अभिनयमा सन्जिब राई, सन्तोष गिरी, सुनिल गिरी, आकृति भुजेल, सोनाम हाङ राई, ललिजन राई, गुरास आचार्य, मनसुना आचार्य, शुशिल भट्टराई, मनिस कठेत, भिषण कार्की र समिक्षा कट्वाल सहभागी थिए। आयोजकका अनुसार यो अभियानले खोटाङमा बढ्दो आत्महत्या समस्यालाई सम्बोधन गर्ने तथा गाउँ–बस्ती, विद्यालय र समुदायमा मानसिक स्वास्थ्यप्रतिको चेतना अभिवृद्धि गर्ने उद्देश्य बोकेको थियो।

‘शून्यदेखि शिखरसम्म’ केवल नाटक मात्र नभई मानसिक स्वास्थ्य जस्ता संवेदनशील विषयमा खुलेर संवाद आवश्यक छ भन्ने सशक्त सन्देश समाजमा प्रवाह गरेको एक महत्वपूर्ण पहलका रूपमा उदाएको छ। समापनसँगै यो अभियानले खोटाङमा समुदाय–केन्द्रित मानसिक स्वास्थ्य जागरणको एक प्रेरणादायी उदाहरण स्थापित गरेको देखिएको छ।