सोलुदुधकुण्डमा राष्ट्रपति रनिङ शिल्ड प्रतियोगिता हुने

मंसिर ९, सोलुखुम्बु । सोलुखुम्बुको सोलुदुधकुण्ड नगरपालिकाले राष्ट्रपति रनिङ शिल्ड प्रतियोगिता आयोजना गर्ने भएको छ । राष्ट्रपति रनिङ शिल्ड प्रतियोगिता संचालन निर्देशिका–२०७० को पाँचौँ संशोधन, २०८० मंसिर ११ का प्रावधानहरू तथा सोलुदुधकुण्ड नगरपालिकाको शैक्षिक पात्रो–२०८२ बमोजिम प्रतियोगिता सञ्चालन गर्न लागिएको हो ।

शिक्षा शाखाका प्रमुख सन्तोष राउतका अनुसार प्रतियोगिता आगामी मंसिर १९ गतेदेखि २२ गतेसम्म जनजागृति माध्यमिक विद्यालयमा सञ्चालन हुने छ । चालु शैक्षिक वर्षको अन्त्यसम्म १८ वर्ष ननाघेका कक्षा १२ सम्मका नियमित विद्यार्थीहरूले जन्मदर्ता प्रमाण, कक्षा ८ को प्रमाणपत्र, एसईई प्रमाणपत्र वा आइएमआइएस कोड अनिवार्य रूपमा पेश गर्नुपर्नेछ ।

साथै खेलाडी दर्ता निर्देशिका २०७० को अनुसूची–४ मा उल्लेखित खेलहरूमा मात्र हुने र अनुसूची–१ अनुसार फाराम भरी दर्ता गर्न आग्रह गरिएको छ । मार्सल आट्र्सतर्फ कराते, तेक्वान्दो र उसुमध्ये एक खेलमा मात्र सहभागी गराउन पाइने व्यवस्था गरिएको छ ।

यसैगरी मार्सल आट्र्समा सहभागी सबै खेलाडीले लाइसेन्स प्राप्त प्रशिक्षकबाट तालिम लिएको हुनुपर्ने छ । मार्सल आट्र्स र एथलेटिक्सका एकल विधामा प्रत्येकमा एक–एक जना मात्र खेलाडी सहभागी हुन पाउने व्यवस्था गरिएको छ । प्रतियोगिताले स्थानीय तह स्तरीय विद्यार्थीहरूमा स्वस्थ प्रतिस्पर्धा, अनुशासन र प्रतिभा विकासमा महत्वपूर्ण योगदान पुर्याउने अपेक्षा राखिएको छ ।