कांग्रेस नेता कार्कीको पहलमा नेचासल्यानमा एम्बुलेन्स, पूर्व मन्त्री केसी द्धारा हस्तान्तरण 

जेठ २४, सोलुखुम्बु । खोलुखुम्बुको नेचासल्यान गाउँपालिकामा एम्बुलेन्स हस्तान्तरण गरिएको छ ।  आज एक कार्यक्रमका बिच एसियन फाउण्डेसन नेपालको सहयोगमा प्राप्त भएको एम्बुलेन्स गाउँपालिका मार्फत वडा नम्बर स्थित प्राथमिक स्वास्थ्य केन्द्र सल्यानलाई हस्तान्तरण गरिएको हो ।

नेपाली कांग्रेसका केन्द्रिय सदस्य तथा पूर्व मन्त्री बलबहादुर केसीको प्रमुख आतिथ्यमामा स्वास्थ्य केन्द्रको सभाहलमा आयोजित एक कार्यक्रमका बिच एम्बुलेन्स प्राथमिक स्वास्थ्य केन्द्र सल्यानलाई एम्बुलेन्स प्राप्त भएको हो । नेपाली काङ्ग्रेसका महाधिवेसन प्रतिनिधि तथा समाजसेवी प्रकाशसिंह कार्कीको पहलमा फाउण्डेसनको सहयोग स्वरुप प्राप्त भएको एम्बुलेन्सबाट अव नागरिकले सहज स्वास्थ्य सेवा पाउने अपेक्षा कार्कीको छ ।  उहाँले आवश्यक सहयोग आफूबाट पनि हुने जनाउदै एम्बुलेन्सलाई जनमुखी बनाउन पालिका र स्वास्थ्य केन्द्रलाई आग्रह गर्नुभएको छ ।  

कार्यक्रममा बोल्दै कार्यक्रमका प्रमुख अतिथि पुर्व मन्त्री केसीले अस्पताल निर्माण गर्नमा आफ्नो मेहनत रहेको स्मरण गर्दै यसको थप सुधार र विकासका लागी स्थानीय सरकारलाई अनुरोध गर्नुभएको छ ।  उहाँले एम्बुलेन्स सञ्चालनका लागी इन्धन र विश्वसनीय चालकको आवश्यकता रहने भन्दै यसका लागी अक्षयकोष अवधारणा लाई अगाडि सार्दा प्रभावकारी हुने जिकिर गर्नुभयो । आफु माननीय रहँदा २०४८ मा नै प्राथमिक स्वास्थ्य केन्द्रको स्थापनाका लागी पहल गरेको र सल्यानका नागरिकले अहिले सेवा पाउँदा गर्व महसुस गरिरहेको उहाँको भनाई छ ।  

उहाँले एम्बुलेन्सका लागी पहल गर्ने नेता कार्की, समन्वय गर्ने स्थानीय सरकार र अस्पताललाई धन्यवाद व्यक्त गर्नुभएको छ । यस्तै कार्यक्रममा बोल्दै नेचासल्यान गाउँपालिकाका अध्यक्ष धनजन राईले एम्बुलेन्स गाउँपालिकाको लागी महत्वपूर्ण रहेको भन्दै यसको प्रयोग र व्यवस्थापनलाई प्रभावकारी बनाइने बताउनुभएको छ ।  

यस्तै अस्पतालका डाक्टर मेडिकल अधिकृत अनिल राय यादवले नेचासल्यान, सोलुदुधकुण्ड र छिमेकी जिल्लाका बिरामीहरूलाई एम्बुलेन्स मार्फत छिटो सेवा दिन सकिने बताउनुभएको छ ।  उहाँले यसको व्यवस्थापन र जनमुखी सेवा प्रबाहका लागी छलफल गरेर कार्यविधि बनाइने जानकारी दिनुभएको हो । कार्यक्रमका सभापति तथा अस्पताल व्यवस्थापन समिति अध्यक्ष तथा वडा अध्यक्ष सिताराम काफ्लेले एम्बुलेन्स प्रदान गर्ने संस्थालाई धन्यवाद व्यक्त गर्दै पहल गर्ने नेता कार्कीलाई धन्यवाद दिनुभएको छ ।  

उहाँले अव एम्बुलेन्सको नियमित सञ्चालनका लागी आफूहरू लागी पर्ने दावी गर्नुभएको छ ।  कार्यक्रममा विद्यार्थी नेता दिनराज बास्तोला, अस्पतालका कर्मचारी, शिक्षकहरू लगायत स्थानीयरहेको उपस्थिती रहेको थियो ।