सोताङमा १८ वर्षमुनिका बालबालिकालाई लक्षित गरी लागुपदार्थ बिक्री–वितरणमा पूर्ण रोक

सबिना राई , मंसिर १४, सोलुखुम्बु । सोलुखुम्बुको सोताङ गाउँपालिकाले १८ वर्षमुनिका बालबालिकाहरूलाई लक्षित गरी नशाजन्य पदार्थ बिक्री–वितरणमा पूर्ण प्रतिबन्ध लगाएको छ । गाउँपालिकाभित्र बालबालिकाहरू कुलत तथा लागुपदार्थको दुष्प्रभावमा फसिँदै गएको अवस्थालाई गम्भीरतापूर्वक लिएर यस्तो निर्णय गरिएको हो ।

जेनजी युवा समूह सोताङको पहल तथा स्थानीयस्तरमा बढ्दो चिन्तालाई मध्यनजर गर्दै गाउँपालिकाले धूम्रपान, मदिराजन्य बस्तु तथा अन्य नशाजन्य पदार्थहरू १८ वर्षमुनिका व्यक्तिलाई बेच्न, वितरण गर्न वा उपलब्ध गराउन कडाइका साथ निषेध गरेको जनाएको छ ।

गाउँपालिकाका निमित्त प्रमुख प्रशासकीय अधिकृत श्रीध्वज राईका अनुसार प्रतिबन्ध उल्लङ्घन गरेको पाइएमा सम्बन्धित व्यवसायीमाथि कडा निगरानी राखिने छ। आवश्यक परे व्यवसाय बन्द गरिनुका साथै दर्ता खारेज गरी प्रचलित कानुनअनुसार कडा कारबाही समेत अघि बढाइने चेतावनी दिइएको छ ।

गाउँपालिकाले सम्पूर्ण व्यवसायी, अभिभावक तथा सरोकारवालाहरुलाई यस निर्णयको पूर्णपालन गर्न आग्रह गर्दै बालबालिकाको स्वास्थ्य, सुरक्षा र भविष्यलाई प्राथमिकता दिन सबैलाई जोडदार अपिल गरेको छ ।