गार्मामा प्रथम अन्तर विद्यालय स्तरीय खेलकुद प्रतियोगिता सकियो, सगरमाथा मावि च्याल्सा विजेता

मंसिर १४, सोलुखुम्बु ।

सबिना राई । सोलुखुम्बुको सोलुदुधकुण्ड नगरपालिका वडा नम्बर ७ गार्मामा प्रथम अन्तर विद्यालय स्तरीय खेलकुद प्रतियोगिता सम्पन्न भएको छ । मंसिर १२ र १३ गते हिमालयन केयर फाउण्डेशन तथा वडा कार्यालयको प्रायोजनमा आयोजित उक्त खेलकुद सम्पन्न भएको हो । गार्मा माविको प्राङ्गणमा सम्पन्न उक्त प्रतियोगितामा वडा भित्रका चारवटा विद्यालयहरूको सहभागिता रहेको आयोजकले जनाएको छ ।

प्रतियोगितामा माध्यमिक र आधारभूत दुवै तहमा उत्कृष्ट प्रदर्शन गर्दै सगरमाथा मावि च्याल्सा समग्र च्याम्पियन बन्न सफल भएको छ । विद्यालयले माध्यमिक तहमा ८ स्वर्ण, ७ रजत र ५ कास्य गरी २० पदक तथा आधारभूत तहमा १० स्वर्ण, ६ रजत र ४ कास्य गरी २० पदक प्राप्त गरेको थियो । कुल ४० पदकसहित प्रथम बनेको सगरमाथा माविले नगद १ लाख ४ हजार ७ सय रुपैयाँ, ट्रफि, मेडल तथा प्रमाणपत्र प्राप्त गरेको वडा अध्यक्ष सोनाम ग्याल्जेन शेर्पाले जानकारी दिनुभयो ।

साथै उक्त विद्यालय मार्च पास विधामा पनि प्रथम रहेको छ । यस्तै गार्मा मावि दुवै तहमा ४ स्वर्ण, ५ रजत र ५ कास्य गरी १४ पदक तथा २ स्वर्ण, ५ रजत र ७ कास्य गरी १४ पदक प्राप्त गर्दै समग्रमा द्धितीय हुन सफल भयो । विद्यालयलाई नगद ७५ हजार ३ सय रुपैयाँ, ट्रफि, मेडल र प्रमाणपत्र प्रदान गरिएको अध्यक्ष शेर्पाले बताउनुभयो । यस्तै आधारभूत तहतर्फ सेकारसिं आवि १ रजत र १ कास्य पदकसहित तृतीय स्थानमा उभिएको छ ।

विद्यालयलाई नगद १८ हजार रुपैयाँ सहित ट्रफि, मेडल र प्रमाणपत्र प्रदान गरिएको आयोजकले जनाएको छ । दुई दिनसम्म चलेको खेलकुद प्रतियोगिताले विद्यार्थीको प्रतिभा अभिवृद्धि तथा विद्यालयबीचको मैत्रीपूर्ण सम्बन्ध सुदृढ गर्न सहयोग पुगेको आयोजकहरूको भनाइ छ ।