थुलुङ दुधकोशी गाउँपालिका ७ मा खानेपानी योजना सम्बन्धी तीनदिने तालिम सम्पन्न

मंसिर १४, सोलुखुम्बु ।
सबिना राई । सोलुखुम्बुको थुलुङ दुधकोशी गाउँपालिका वडा नम्बर ७ देउसामा खानेपानी योजना सम्बन्धी तीनदिने तालिम सम्पन्न भएको छ । गाउँपालिकामा चेराखु बाराफार तथा चेराखु ठाँटीफार निया खानेपानी उपभोक्ता तथा सरसफाइ समितिको आयोजना निर्माण अघिको तीनदिने तालिम सकिएको हो ।

खानेपानी योजनालाई दीगो बनाउने तरिका, शुद्ध पेयजल घर–घरमा पुयाउने विधि तथा योजना सफल बनाउन उपभोक्ता समितिको भूमिकाबारे तालिम दिइएको थियो । उक्त तालिम गोर्खा वेल्फेयर ट्रष्ट नेपाल, प्रोजेक्ट सेल कम्युनिटी एड पोखरा (कास्की) गण्डकी प्रदेशको सहजीकरणमा सम्पन्न भएको हो । तालिममा सहभागी टोलीलाई वडा कार्यालयले धन्यवाद व्यक्त गरेको छ । गोर्खा वेल्फेयर ट्रष्ट नेपालका सामाजिक परिचालक निरमाया पुनको नेतृत्वमा आएको टोलीले स्थानीय उपभोक्तालाई आवश्यक सीप तथा जानकारी प्रदान गरेको थियो ।

गाउँपालिकाका प्रवक्ता तथा वडा अध्यक्ष भोजराज कार्कीका अनुसार गोर्खा वेल्फेयर नेपालमार्फत वडाभित्रका चारवटा स्किममा खानेपानी योजना सञ्चालन हुने भएको छ । वडा कार्यालय क्षेत्र लुचि, सामलेकुदेखि तल दुधकोशी नदी किनारसम्मका बस्तीमा खानेपानी वितरण प्रणाली निर्माण हुनेछ । अन्य क्षेत्रमा भने प्रदेश खानेपानी कार्यालयमार्फत आवश्यक कार्य भइरहेको जानकारी कार्कीले दिनुभयो ।

समाज रूपान्तरण तथा गाउँ विकासका लागि स्थानीयको हातेमालो आवश्यक रहेको उहाँले बताउनुभयो । दीर्घकालीन रूपमा खानेपानी समस्याको समाधान गर्न गाउँपालिका प्रतिबद्ध रहेको जनाइएको छ ।