काठमाण्डौबाटै सेयर फारम भराइरहेका युवाको टोलीले दिए एकै दिन ६१३ जनालाई सेवा

मंसिर १४, सोलुखुम्बु । तल्लो सोलु हाइड्रोपावर लिमिटेडको ८२ मेगावाट परियोजनाको सेयर फारम काठमाण्डौबाट समेत भर्ने व्यवस्था भएपछि उपत्यकामा रहेका सोलुबासीलाई एकै दिन ६ सयभन्दा बढीले सेवा पाएका छन् । आईतबार मात्र दिनराज बास्तोला, बाबुराम आचार्य, भाइकाजी शर्मा, भिम राइ, इन्द्र बास्तोला लगायतको सक्रिय युवा टोलीले ६१३ जनालाई सेयर फारम भरिदिएर सहजीकरण गरेको बताइएको छ ।

भौतिक रूपमा बैंकमा लाइन लागेर फारम भर्नुपर्ने झन्झट, समय खर्चिनुपर्ने समस्या तथा बालबालिका, वृद्धवृद्धा र अशक्तहरूलाई पर्ने कठिनाइलाई मध्यनजर गर्दै चाबहिलस्थित काउन्टरमार्फत सेवा सञ्चालन गरिएको अभियन्ता तथा काँग्रेस नेता दिनराज बास्तोलाले जानकारी दिनुभयो ।

“उपत्यकामा रहेका सोलुबासीलाई अधिकार सुनिश्चित गर्न र सबैलाई बराबरी पहुँच दिलाउन हामीले सहजीकरण गर्दै आएका छौँ,” नेता बास्तोलाले भन्नुभयो। उहाँका अनुसार शेयर भर्नको अन्तिम अवधिसम्म यो सेवा निरन्तर रहनेछ ।

सुरुमा केही पालिकालाई मात्र सेयर वितरण गर्ने निर्णय भएपछि जिल्लाभर चर्को विवाद भएको थियो। तर विभिन्न तहबाट भएको दबाब तथा पहलपछि सम्पूर्ण सोलुखुम्बु जिल्लावासीलाई शेयर हिस्सामा समावेश गरिएको हो।युवा टोलीको पहलपछि राजधानीमा बसेका सोलुबासीले सहज र छिटो सेवा पाउन थालेको भन्दै लाभान्वितहरुले धन्यवाद व्यक्त गरेका छन्।