लिखु पिकेले गर्यो जेनजी प्रतिनिधिसँग ४ घण्टे छलफल, सामाजिक सञ्जालमा भ्रम नफैलाउन गाउँपालिकाको आग्रह

मंसिर १४, सोलुखुम्बु । सोलुखुम्बुको लिखुपिके गाउँपालिकाले मंसिर १२ गते जेनजी प्रतिनिधि माधव बस्नेतको नेतृत्वमा आएको टोलीसँग विशेष समन्वय तथा आन्तरिक छलफल सम्पन्न गरेको छ । करिब चार घण्टा चलेको उक्त बैठक सौहार्दपूर्ण, शान्त र सकारात्मक वातावरणमा सम्पन्न भएको गाउँपालिकाले जनाएको छ ।

गाउँपालिकाका अनुसार छलफलको मूल उद्देश्य जेनजी युवाहरूका माग, सुझाव तथा चासोलाई औपचारिक रूपमा सुन्नु र आगामी नीतिगत तथा कार्यक्रमगत कार्ययोजनामा आवश्यक समायोजनका आधार तयार गर्नु थियो । समन्वय, कार्यक्रम संरचना, पारदर्शिता, सूचनाको पहुँच र सार्वजनिक प्रस्तुति जस्ता शीर्षकमा दुवै पक्षबीच विस्तृत र रचनात्मक संवाद भएको जनाइएको छ । यसैबीच, सामाजिक सञ्जालमा बैठक बहिष्कार भएको भन्ने दाबीहरू फैलिन थालेपछि गाउँपालिकाले ती हल्लालाई तथ्यहीन र भ्रम फैलाउने गतिविधि भएको भन्दै प्रष्टोक्ति दिएको छ ।

बैठकमा सहभागी नै नभएका केही व्यक्तिहरूले फेक आइडी प्रयोग गरी गलत सूचना प्रवाह गरेको भन्दै गाउँपालिकाले गम्भीर ध्यानाकर्षण गराएको छ । छलफल सुरु हुनुअघि केही गैर–जेनजी व्यक्तिहरूले अनधिकृत रूपमा स्थलमा प्रवेश गर्न खोजे पनि गाउँपालिका र जेनजी प्रतिनिधिहरूको समन्वयमा रोकिएको गाउँपालिकाले जनाएको छ। यस्ता हस्तक्षेप रोकिएका कारण छलफल विषय–केन्द्रित र मर्यादित रूपमा सञ्चालन गर्न सहज भएको बताइएको छ ।

लाइभ प्रसारणसम्बन्धी सार्वजनिक भ्रम हटाउँदै गाउँपालिकाले उक्त बैठक पूर्ण रूपमा आन्तरिक प्रकृतिको भएकाले प्रत्यक्ष प्रसारण गर्ने योजना नै नभएको स्पष्ट पारेको छ । जेनजी समूहभित्र पनि यस सम्बन्धमा आन्तरिक कुराकानी भए पनि अन्ततः दुवै पक्षले सार्वजनिक कार्यक्रमहरूमा मात्र लाइभ गर्ने र आन्तरिक छलफल गोप्य राख्ने सहमति गरेको प्रवक्ता मणिराज बस्नेतले जानकारी दिनुभयो ।

बैठकको अन्त्यमा जेनजी टोली र गाउँपालिकाका प्रतिनिधिहरूले छलफल सफल र सम्मानजनक रूपमा सम्पन्न भएको निष्कर्ष निकाल्दै आगामी दिनमा अझ विस्तृत संवाद जारी राख्ने प्रतिबद्धता व्यक्त गरेका थिए । सकारात्मक वातावरणको प्रतीकस्वरूप दुवै पक्षले सामूहिक तस्वीर खिचेर कार्यक्रम समापन गरिएको थियो ।

गाउँपालिकाले युवाहरूको सोच, ऊर्जा र सुझावलाई संस्थागत रूपमा समेट्दै पारदर्शी र प्रक्रियागत ढङ्गले सम्बोधन गर्ने प्रतिबद्धता दोहो¥याउँदै सामाजिक सञ्जालमा तथ्य नबुझी भ्रम फैलाउने गतिविधिबाट टाढा रहन र यथार्थमा आधारित संवादलाई प्राथमिकता दिन सबैसँग आग्रह गरेको छ ।