गार्मामा साढे ५ करोड रुपैयाँको बालमैत्री भवन बन्दै, मेयर शेर्पाले गरे शिलान्यास

मंसिर १५, सोलुखुम्बु । सोलुखुम्बुको सोलुदुधकुण्ड नगरपालिका–७ गार्मास्थित गार्मा माध्यमिक विद्यालयमा करिब साढे ५ करोड रुपैयाँ लागतमा आधुनिक बालमैत्री भवन निर्माण थालिएको छ । सोलुदुधकुण्ड नगरपालिका र दातृ संस्था ‘क्लासरुम्स इन द क्लाउड्स नेपाल’ को संयुक्त लगानीमा बन्ने उक्त भवनको सोमबार नगर प्रमुख नाम्गेल जाङ्बु शेर्पाले शिलान्यास गर्नुभयो ।

शिलान्यास कार्यक्रमलाई बोल्दै मेयर शेर्पाले शिक्षाको गुणस्तर वृद्धि गर्न आवश्यक सबै कदम चाल्न नगरपालिका प्रतिबद्ध रहेको बताउनुभयो। जिल्लाकै नमुना विद्यालयका रूपमा रहेको गार्मा माविमा निर्माण हुन लागेको भवन पनि अब्बल र अत्याधुनिक हुने विश्वास व्यक्त गर्नुभयो। उपमेयर गान्धी माया तामाङले भवन निर्माणको काममा निरन्तर अनुगमन गर्ने प्रतिवद्धता जनाउनुभयो।

यस्तै कार्यक्रममा क्लासरुम्स इन द क्लाउड्स नेपालका अध्यक्ष दावा ग्याल्जेन शेर्पाले नगरपालिका र विद्यालयसँग सहकार्य गर्न पाएकोमा खुशी व्यक्त गर्दै नयाँ भवनको प्रभावकारी उपयोग र व्यवस्थापन विद्यालयको प्रमुख जिम्मेवारी हुने बताउनुभयो। वडा अध्यक्ष सोनाम ग्याल्जेन शेर्पाका अनुसार भवनमा छ वटा सुसज्जित कक्षाकोठा, प्राविधिक मापदण्डअनुसारको शौचालय, पिउने पानीको सुविधा तथा शिक्षण–सिकाइ सहज बनाउने थप आवश्यक भौतिक संरचना समावेश गरिनेछ ।

विद्यालयका प्रध्यानाध्यापक विनोद सिंह तामाङले भवन निर्माण सम्पन्न भएपछि विद्यालयको शैक्षिक वातावरण थप सुधारिने, विस्तारित कार्यक्रम सहज रूपमा सञ्चालन हुने र विद्यार्थी संख्यामा समेत वृद्धि हुने अपेक्षा व्यक्त गर्नुभयो । स्थानीय समुदाय र साझेदार संस्थाको सहकार्यमा अघि बढाइएको यो परियोजनाले विद्यालयको समग्र विकासमा महत्वपूर्ण योगदान पु¥याउने जनाइएको छ ।