ट्राफिक प्रहरी सोलुले गर्यो पहिलो चौमासिकमा चार लाख रुपैयाँभन्दा बढी राजस्व संकलन

मंसिर १६, सोलुखुम्बु । जिल्ला ट्राफिक प्रहरी कार्यालय सोलुखुम्बुले चालु आर्थिक वर्षको पहिलो चौमासिकमा चार लाख रुपैयाँभन्दा बढी राजस्व संकलन गरेको छ । विभिन्न ट्राफिक नियम उल्लङ्घनका आधारमा चार महिनाको अवधिमा गरिएको कारबाहीबाट कार्यालयले कुल ४ लाख १५ हजार ५ सय रुपैयाँ राजस्व संकलन गरेको हो ।

कार्यालयका प्रहरी जवान नेत्रकुमार तामाङका अनुसार साउन महिनामा १०५ सवारीसाधन कारबाहीमा परेर १ लाख २६ हजार ५ सय रुपैयाँ संकलन गरिएको थियो । त्यसैगरी भदौमा १०२ सवारीसाधन कारबाहीबाट १ लाख ९ हजार रुपैयाँ, असोजमा ५६ सवारीसाधन कारबाहीबाट ६१ हजार ५ सय रुपैयाँ, र कार्तिकमा ९३ सवारीसाधन कारबाहीमा परेर १ लाख १८ हजार ५ सय रुपैयाँ राजस्व उठाइएको कार्यालयले जनाएको छ ।

पहिलो चौमासिकमा मात्रै ३५६ सवारीसाधन नियम उल्लङ्घनका कारण कारबाहीमा परेका छन् । तामाङका अनुसार मापसे, ओभरलोड, लाइसेन्स बिना सवारी चलाउने, क्षमता भन्दा बढी यात्रु तथा माल बोक्ने, पटके इजाजतपत्र बिना सञ्चालन, तीव्र गति र लाइसेन्स साथमा नराख्ने लगायतका सवारीसाधन प्रमुख रूपमा कारबाहीमा परेका हुन् । ट्राफिक प्रहरीले नियमित अनुगमन तथा चेकजाँचलाई अझ प्रभावकारी बनाउँदै नियम उल्लङ्घन रोकथाममा कडाइ गर्ने तयारी गरेको जनाएको छ ।