मंसिर १७, सोलुखुम्बु । सोलुखुम्बुको सोलुदुधकुण्ड नगरपालिका–११ तिङ्लामा ३४औँ अन्तर्राष्ट्रिय अपाङ्गता दिवस तथा लैङ्गिक हिंसा विरुद्धको १६ दिने अभियान संयुक्त रूपमा मनाइएको छ । कार्यक्रम नगरपालिकाको सहयोग र सोलुदुधकुण्ड अपाङ्गता मिलिजुली समूहको संयोजनमा मनाएको हो ।
कार्यक्रममा समावेशी समाज निर्माण, अपाङ्गता भएका व्यक्तिहरूको अधिकार, अवसर र सम्मान सुनिश्चित गर्न यस दिवसले महत्वपूर्ण प्रेरणा प्रदान गर्ने वडाध्यक्ष टंक बहादुर कार्कीले बताउनुभयो । उहाँका अनुसार अपाङ्गता सम्बन्धी मुद्दालाई स्थानीय तहमा मुख्य धारणामा ल्याउन यस्तो अभियानले सहयोग पुर्याइरहेको छ ।
साथै, लैङ्गिक हिंसा विरुद्धको १६ दिने अभियान पनि वडामा आयोजना गरिएको छ । अभियानले समुदायमा लैङ्गिक समानता, महिला तथा बालिकाको सुरक्षा र हिंसामुक्त समाज निर्माणको सन्देश फैलाएको आयोजकहरूले बताएका छन् । उक्त कार्यक्रममा सोलुदुधकुण्ड नगरपालिकाकी उप–मेयर गान्धि माया तामाङ, वडाका जनप्रतिनिधि, विभिन्न संघ–संस्थाका प्रतिनिधि र स्थानीयवासीहरूको सक्रिय उपस्थिती रहेको थियो ।
Discussion about this post