नेपाली कांग्रेस सुधार अभियानले जिल्लागत संयोजक टुंग्यायो, सोलुका संयोजकमा बिभुषण राई

मंसिर २०, सोलुखुम्बु । नेपाली कांग्रेस सुधार अभियानले जिल्लागत संरचना विस्तार गर्ने क्रममा नयाँ जिल्ला संयोजकहरूको नाम सार्वजनिक गरेको छ । अभियानका केन्द्रीय संयोजन समितिका तर्फबाट शिव रिमालले शुक्रबार देशभरका विभिन्न जिल्लाका संयोजक तोकिएको जानकारी दिनुभयो ।

सुधार अभियानले पार्टीभित्र युवाको प्रभावकारी सहभागिता सुनिश्चित गर्दै प्रत्येक तहमा तथा आम निर्वाचनमा कम्तीमा ४० प्रतिशत युवा प्रतिनिधित्व अनिवार्य गर्न दबाब सिर्जना गरिरहेको छ । यसैसँगै, उम्मेदवार छनोट प्रक्रियालाई प्राइमरी इलेक्सनमार्फत पारदर्शी बनाउनुपर्ने माग पनि अभियानको मूल एजेन्डा बनेको छ ।

यसै क्रममा सोलुखुम्बुका लागि विभुषण राईलाई जिल्ला संयोजक तोकिएको छ । राई हाल नेविसंघ सोलुखुम्बुका जिल्ला सभापति समेत हुन्। । युवापुस्तामा सक्रिय र विश्वसनीय नेतृत्वका रूपमा परिचित राईलाई सुधार अभियानका उद्देश्यहरू जिल्ला स्तरमा प्रभावकारी रूपमा कार्यान्वयन गर्ने जिम्मेवारी दिइएको अभियानले जनाएको छ ।

सुधार अभियानका अगुवाहरूका अनुसार पार्टीभित्र देखिँदै आएको भ्रष्टाचार, अपारदर्शिता र मनोनयन प्रक्रियामा हुने पक्षपात को विरुद्धमा कडा निगरानी राख्न तथा सुशासन र पारदर्शी प्रक्रियाको संस्थागत व्यवस्था कायम गर्न अभियान निरन्तर सक्रिय हुँदै आएको छ ।

अभियानले सहभागी युवाहरूले विश्वास व्यक्त गरेको छ कि पार्टी संरचनामा पारदर्शिता, आन्तरिक लोकतन्त्र र प्राथमिक निर्वाचन प्रणाली लागू भए मात्र पार्टी संगठन बलियो हुने र आम जनतामा पार्टीप्रति भरोसा पुनः स्थापित हुने छ । यससँगै सुधार अभियानले जिल्लास्तरमै संगठन सुदृढीकरण, युवा सक्रियता वृद्धि र नीतिगत सुधारका कार्यक्रमलाई थप सशक्त रूपमा अघि बढाउने तयारी गरेको जनाएको छ ।