गार्मा माविको “करोड अक्षयकोष” अभियानमा सहयोगको ओइरो, १ लाख रुपैयाँ सम्मको प्रतिबद्धता

मंसिर २०, सोलुखुम्बु । सोलुदुधकुण्ड नगरपालिका–७ स्थित गार्मा माध्यमिक विद्यालयमा स्थापना गरिएको “करोड अक्षयकोष” अभियानमा आर्थिक सहयोग निरन्तर जुटिरहेको छ । जोरबौद्धका स्थानीय तथा हाल अमेरिकाको क्यालिफोर्नियामा बसोबास गर्दै आएका पासाङ शेर्पाले १ लाख रुपैयाँ सहयोग गर्ने प्रतिबद्धता जनाएका हुन् ।

शनिबार विद्यालय व्यवस्थापन समिति अध्यक्ष तथा गार्माका वडा अध्यक्ष सोनाम ग्याल्जेन शेर्पालाई भेटेर सहयोगको प्रतिबद्धता जनाउनुभएको हो । आफू पढेको विद्यालय भएकाले सहयोग गरेको शेर्पाको भनाइ छ । त्यस्तै, आगामी दिनमा नुम्बुर भोकेशनल तालिम केन्द्रलाई पनि सहयोग गर्ने प्रतिबद्धता रहेको केन्द्रका प्रमुख निमा शेर्पाले जानकारी दिनुभयो ।

जिल्लाकै नमुना विद्यालयको रूपमा पहिचान बनाएको गार्मा माध्यमिक विद्यालयमा “करोड अक्षयकोष” अभियान वि.सं. २०७६ साल माघ महिनादेखि सुरु गरिएको हो । गार्माको गुणस्तरीय शिक्षाको सुनिश्चितता र स्थायी स्रोत व्यवस्थापन गर्ने उद्देश्यका साथ सञ्चालन गरिएको एक करोड रुपैयाँको अक्षयकोष अभियानमा अहिलेसम्म धेरै दाता जोडिसकेका छन् भन्ने विद्यालय व्यवस्थापन समिति (वि.व्य.स)का अध्यक्ष सोनाम ग्याल्जेन शेर्पाले बताउनुभयो । देश–विदेशमा रहेका विद्यालयका पूर्वविद्यार्थी तथा सहयोगी दाताहरूले कोषमा निरन्तर सहयोग गरिरहेको उहाँको भनाइ छ ।

यस अभियानले गार्मा मा.विलाई जिल्लाकै नमुना विद्यालयका रूपमा स्थापित गर्न मेरुदण्डको काम गर्ने विश्वास व्यक्त गरिएको छ । कोषको ब्याज रकमलाई विद्यालय व्यवस्थापन तथा गुणस्तरीय शिक्षा प्रदान गर्न प्रयोग गरिने वडा अध्यक्ष शेर्पाले जानकारी दिनुभयो । “शैक्षिक उन्नयनका लागि दीगो स्रोत व्यवस्थापन गर्ने उद्देश्यले ‘करोड अक्षयकोष’ अभियान सञ्चालन गरिएको हो,” शेर्पाले भन्नुभयो ।

जिल्लाकै अग्रणी विद्यालयको छवि बनाएको गार्मा मा.विले कृषि तर्फ बाली विज्ञान, विज्ञान संकाय र अङ्ग्रेजी माध्यममा पठन–पाठन सञ्चालन गर्दै आएको छ । सोलुखुम्बु, खोटाङ, ओखलढुंगा लगायत जिल्लाका विद्यार्थी अध्ययनरत यस विद्यालयले सुस्त श्रवण कक्षा तथा निःशुल्क होस्टेलसमेत सञ्चालन गर्दै आएको छ ।