दिक्तेल रुपाकोट मझुवागढी नास्टबाट पुरस्कृत, यस्तो छ कारण ?

मंसिर २०, सोलुखुम्बु । खोटाङको दिक्तेल रुपाकोट मझुवागढी नगरपालिका भुवनेश्वर प्रविधि पुरस्कारबाट पुरस्कृत भएको छ। नेपाल विज्ञान तथा प्रविधि प्रज्ञा प्रतिष्ठान नास्टको ४३ औं वार्षिकोत्सव तथा पुरस्कार वितरण समारोह काठमाण्डौ खुमलटारमा शनिबार २५ हजार राशीको पुरस्कारबाट पुरस्कृत भएको हो।

जिल्लाका १० स्थानीयतहमध्ये भूगोल र जनसंख्यामा सबभन्दा ठूलो १५ वडा रहेको दिक्तेल रुपाकोट मझुवागढी नगरपालिकाले सबै ठाउँमा पाइने बहुउपयोगी वनस्पति बाँसलाई राष्ट्रियकरण गर्ने अभियान चलाईरहेको छ। बाँसजन्य सामग्रीको प्रयोग, उत्पादन गर्न उद्योग स्थापना, खेती गर्न र बाँसको प्रवर्द्धन र विकासका लागि अनुकूल कानुन बनाउन माग गर्दै गएको साउन १४ गतेदेखि काठमाडौंमा १० दिन लामो सत्याग्रह बसेका थिए।

बाँसजन्य सामग्रीको उत्पादन गर्ने, उद्योग व्यवसाय चलाउन सके स्थानीयस्तरमै रोजगारी सिर्जना हुने र त्यसले युवा जमातलाई विदेश पलायन हुनबाट रोक्नुका साथै सर्वसाधारणले पनि आयआर्जन गरेर आत्मनिर्भर हुनसक्ने लक्ष्य नगरपालिकाको छ। आफ्नो र उपमेयर राई दुवैको कार्यकक्षमा सबै सामग्री बाँसको प्रयोग गर्दै गराउँदै आएका मेयर भट्टराईले कठिन भोक हड्तालपछि माग पुरा गराउन सरकारलाई बाध्य बनाएका थिए।

उनको माग बमोजिम भर्खरै सरकारले बाँसजन्य निर्देशिका पारित गरेर राजपत्रमा प्रकाशित गरिसकेको छ। ऊर्जा, जलस्रोत, सिँचाइ तथा भौतिक पूर्वाधार मन्त्री कुलमान घिसिङले बाँसका संरचना निर्माणसम्बन्धी मार्गदर्शन स्वीकृत गरेका हुन्। सो मार्गदर्शन पारित भएसँगै बाँस तथा बाँसजन्य सामग्रीको प्रवर्द्धन तथा नीति निर्माणको बाटो खुलिसकेको छ।