रामप्रसादराई गाउँपालिकाको टोलीले थुलुङ दुधकोशीको शिक्षा सुधार अभियान अवलोकन गर्‍यो

मंसिर २३, सोलुखुम्बु । भोजपुरको रामप्रसादराई गाउँपालिका अध्यक्ष थाम बहादुर राई नेतृत्वको टोली शैक्षिक अवलोकन तथा अध्ययन भ्रमणका लागि सोमबार सोलुखुम्बुको थुलुङ दुधकोशी गाउँपालिका पुगेको छ । गाउँपालिका प्रवक्ता भोजराज कार्कीका अनुसार टोली मंगलबार भ्रमण सकाएर फर्किएको हो । भ्रमणको पहिलो दिन थुलुङ दुधकोशी गाउँपालिका अध्यक्ष असिम राईले आफ्नो पालिकाले शिक्षा क्षेत्र सुधारका लागि गरिरहेका विभिन्न गतिविधिबारे विस्तृत जानकारी दिनुभयो ।

शैक्षिक सम्मेलन आयोजना, २१ बुँदे परिमार्जित सेतो पत्र जारी, विभिन्न सहयोगी संस्थासँग सहकार्य लगायतका कार्यक्रमहरूबारे अध्यक्ष राईले टोलीलाई अवगत गराइएको छ । प्रवक्ता कार्कीका अनुसार गाउँपालिकाले उत्कृष्ट विद्यार्थी, शिक्षक, प्रधानाध्यापक तथा विद्यालयलाई पुरस्कार प्रदान गर्ने, प्रधानाध्यापकलाई थप भत्ता उपलब्ध गराउने तथा शैक्षिक गुणस्तर अभिवृद्धिका लागि विविध कार्यक्रम सञ्चालन गरिरहेको जानकारी गराइएको थियो ।

मंगलबार टोलीले वडा नं. ६, ७ र १ का विभिन्न विद्यालयहरूको अवलोकन गरेको थियो । भ्रमणपछि रामप्रसादराई गाउँपालिका अध्यक्ष थाम बहादुर राईले थुलुङ दुधकोशी गाउँपालिकाले शिक्षा क्षेत्रमा गरेको कार्य अनुकरणीय रहेको भन्दै प्रशंसा व्यक्त गर्नुभयो । उहाँले थुलुङ दुधकोशीको शैक्षिक अभ्यासले आफ्नो पालिकामा आवश्यक शैक्षिक परिवर्तन गर्न प्रेरणा र मार्गदर्शन प्रदान गर्ने बताउनुभयो ।

२०८१ सालको एसईई परीक्षामा थुलुङ दुधकोशी गाउँपालिकाले शतप्रतिशत नतिजा हासिल गरेको तथ्यका आधारमा नै अध्ययन भ्रमणका लागि पालिकाले यो स्थान छानेको अध्यक्ष राईले बताउनुभयो । अवलोकन भ्रमण सकिएपछि दुबै गाउँपालिकाले एक–अर्कालाई स्थानीय उत्पादनमार्फत सम्मान गरेका छन्। भोजपुरको तर्फबाट भोजपुरे खुकुरी प्रदान गरिएको भने थुलुङ दुधकोशी गाउँपालिकाको तर्फबाट स्थानीय रुपमा उत्पादन गरिएको राँडी हस्तान्तरण गरिएको छ ।