महाकुलुङका एकै परिवारका तीन जनालाई शाखा अधिकृतमा नियुक्ति

मंसिर २४, सोलुखुम्बु । सोलुखुम्बुको महाकुलुङ गाउँपालिका–३ का एकै परिवारका तीन सदस्य शाखा अधिकृतमा सिफारिस भई बुधबार नियुक्ति भएका छन् । महाकुलुङ ३ का वडा अध्यक्ष दुर्गाबहादुर कुलुङका जेठा छोरा एकराज कुलुङ, बुहारी मनीषा कुलुङ र कान्छा छोरा बालकुमार कुलुङले कुनै ट्युसन नधाइ घरमै तयारी गर्दै परीक्षा उत्तीर्ण गरेका हुन् । तीनै जना यसअघि नायब सुब्बा पदमा कार्यरत थिए ।

एकराज र बालकुमार महालेखा परीक्षकको कार्यालयमा तथा मनीषा राष्ट्रिय किताबखानामा कार्यरत छन् । परिवारका तीन सदस्य एकैपटक अधिकृतमा सिफारिस भएपछि घर–परिवारदेखि स्थानीय समुदायसम्म खुसी छाएको छ । सफलताबारे एकराजले निरन्तर अभ्यास र पारिवारिक सहकार्य नै मुख्य आधार भएको बताउनुभएको छ ।

बालकुमारले लोक सेवा आयोगको परीक्षा निष्पक्ष हुने भएकाले परिश्रम गरे जो–कसैले सफल हुन सक्ने बताउनुभयो । यता मनीषाले परिवारकै साथ र प्रेरणाले आफ्नो सपना पूरा भएको बताउनुभयो । गाउँपालिका अध्यक्ष सूर्यबहादुर कुलुङका अनुसार वैदेशिक रोजगारीतर्फ आकर्षण बढिरहेका बेला एउटै परिवारका तीन जनाले सरकारी सेवामा अधिकृत पद हासिल गर्नु गाउँ तथा जिल्लाकै गौरवको विषय रहेको बताउनुभयो ।