केपिलासगढी गाउँपालिकामा सकियो लैङ्गकि हिंसा विरुद्धको १६ दिने अभियान

मंसिर २४, सोलुखुम्बु । खोटाङको केपिलासगढी गाउँपालिकामा लैङ्गिक हिंसा विरुद्धको १६ दिने अभियान सफलतापूर्वक सम्पन्न गरिएको छ । “प्रविधिको सही प्रयोग गरौँ, लैङ्गिक हिंसा अन्त्य गरौँ” भन्ने मुल नाराका साथ मंसिर ९ गतेदेखि सुरु गरिएको अभियानको औपचारिक समापन गरिएको गाउँपालिकाका अध्यक्ष समिर राईले जानकारी दिनुभयो ।

गाउँपालिकाको आयोजनामा सञ्चालित सो अभियानमा समुदायस्तरका विविध सचेतना कार्यक्रम, विद्यालयस्तरीय अन्तरक्रिया, घरेलु हिंसा र मानव बेचबिखन सम्बन्धी अभिमुखीकरण, कानुनी सहायता तथा प्रविधिको सुरक्षित प्रयोगबारे प्रशिक्षणसमेत दिइएको थियो ।

अध्यक्ष राईका अनुसार अभियानको मुख्य उद्देश्य गाउँपालिका भित्र बढ्दो लैङ्गिक हिंसा नियन्त्रण गर्न, जोखिम समूहलाई सचेत गराउन, हिंसाका घटनाबारे खुला संवादको वातावरण बनाउन र समानता तथा सुरक्षित समाज निर्माणमा स्थानीय तहको सक्रियता बलियो बनाउनु रहेको थियो ।

अभियानका क्रममा महिलाहरू, युवा समूह, स्थानीय नेतृहरू, विद्यालयका शिक्षक, विद्यार्थी तथा नागरिक समाजका प्रतिनिधिहरूको उल्लेखनीय सहभागिता रहेको गाउँपालिकाले जनाएको छ । स्थानीय तहले आगामी दिनमा पनि लैङ्गिक हिंसाविरुद्ध निरन्तर काम गर्ने प्रतिबद्धता व्यक्त गरेको छ ।