मंसिर २४, खोटाङ । मंसिर २८ गते दिक्तेलको माटिकोरे कवर्ड हलमा सञ्चालन हुने राष्ट्रपति कपसँगै १६ औं जिल्ला स्तरीय कराते तथा ४औं जिल्ला स्तरीय तेक्वान्दो प्रतियोगिताको तयारीबारे जानकारी दिन आयोजित पत्रकार सम्मेलन दिक्तेलमा सम्पन्न भएको छ ।
कार्यक्रममा आयोजक संस्थाहरूले खेल प्रतियोगिताहरूको समुचित तयारी, व्यवस्थापन तथा खेलाडीहरूको सहभागिताबारे सार्वजनिकरूपमा जानकारी गराउँदै स्थानीय तहदेखि संघीयस्तरसम्म सहकार्य आवश्यक रहेको बताएका छन् । नेपाल कराते महासंघका निवर्तमान केन्द्रीय सदस्य संजय राईले गणतन्त्रलाई स्वीकार्ने प्रत्येक नागरिकले खेलमार्फत राष्ट्रिय पहिचान, एकता र समावेशी भावनाको प्रवद्र्धन गर्नुपर्ने आवश्यकता औँल्याउँदै आवश्यक सहयोगका लागि अपिल गर्नुभयो ।
उहाँले प्रतियोगिताका लागि राष्ट्रिय तथा अन्तर्राष्ट्रिय स्तरका निर्णायकहरू खोटाङ आउने जानकारी समेत दिनुभयो । नेपाल तेक्वान्दो संघ, खोटाङका सचिव मोहन राईले राष्ट्रपति कपसँगै आयोजना हुने कराते तथा तेक्वान्दो प्रतियोगिताका उप–इभेन्ट, सहभागी खेलाडी संख्या, कार्यक्रमका आयाम तथा उद्देश्यबारे विस्तृत जानकारी प्रस्तुत गर्नुभयो।
खेलकुदको माध्यमबाट स्थानीय प्रतिभा पहिचान र प्रोत्साहन गर्ने उद्देश्यले प्रतियोगितालाई थप व्यवस्थित र प्रभावकारी बनाउने तयारी भइरहेको बताइएको छ । पत्रकार सम्मेलनमा नेपाल कराते महासंघ खोटाङका अध्यक्ष सुमन राई, नेपाल शितोरियो कराते संघ खोटाङका अध्यक्ष मिलन कसजु, जिल्ला खेलकुद विकास समिति कार्यालय प्रमुख लिलाभक्त केशी, नेपाल आदिवासी जनजाति समन्वय परिषद्का अध्यक्ष फुर्वा शेर्पा, नेपाल शितोरियो कराते संघ खोटाङका सचिव मोतिचन्द्र राईसहित पत्रकार तथा सरोकारवालाहरूको व्यापक उपस्थिति रहेको थियो ।
Discussion about this post