विपन्न जनताको हलेसी तुवाचुङ नगरपालिकाले घर बनाईदिने, अभावको घाउमा सरकारको मलम

मंसिर २५, सोलुखुम्बु । खोटाङको हलेसी तुवाचुङ नगरपालिकाले तीन विपन्न परिवारलाई भूकम्प–प्रतिरोधी घर निर्माण गरिदिने निर्णय गरेको छ । नगरपालिकाको १३६औँ कार्यपालिका बैठकले आफ्नो नागरिकको पीडा कम गर्ने उद्देश्यले तीन विपन्न परिवारका लागि भूकम्प–प्रतिरोधी घर निर्माण गर्ने निर्णय गरेको हो । बैठकका निर्णय सँगै ती विपन्न परिवारलाई आवास निर्माण गरी चाडैँ हस्तान्तरण गरिने नगरप्रमुख बिमल राईले बताउनुभयो ।

कठिन परिस्थितिबाट गुज्रिरहेका यी परिवारमध्ये हलेसी तुवाचुङ–१० अर्खौलेका सरिता सार्की र वीरबहादुर सार्कीको परिवार अहिले गम्भीर मानसिक तनावमा छन् । उनीहरूकी १२ वर्षीया छोरी तारा सार्की गत साउन २९ गते दिक्तेल रुपाकोट मझुवागढी–३ बाम्रामका राम हिङ्माङको घरमा झुन्डिएको अवस्थामा मृत फेला परेकी थिइन् । परिवारले घटनालाई शंकास्पद बताउँदै सत्य बाहिर नआएको गुनासो गर्दै आएका छन् । यति मात्र होइन, दुःखले नथाक्दै गर्भवती आमा सरिता सार्कीको सात महिनाको बच्चा पनि गर्भपतन भएको छ ।

यस्तै, घर निर्माण सहयोगका लागि छनोटमा परेका अन्य दुई परिवारमा हलेसी तुवाचुङ–६ मंगलटारका भया दमाई र हलेसी तुवाचुङ–२ डिकुवाका देशवीर राई रहेका छन् । विपन्न अवस्थाका यी तीनै परिवारलाई नगरपालिकाले सुरक्षित संरचना उपलब्ध गराउने निर्णय गरेको हो । चार महिनाअघि नगरपालिकाले यी तीनै परिवारलाई नगद १५–१५ हजार रुपैयाँसहित खाद्यान्न सहयोग पनि गरेको नगर प्रवक्ता कमल गिरीले जानकारी दिनुभयो । नगरपालिकाको यो निर्णयले कठिन परिस्थितिमा परेका परिवारलाई राहत मिल्ने अपेक्षा गरिएको छ ।