अनलाइनबाट नागरिकता सिफारिस दिने सोलुकै पहिलो वडा बन्यो गार्मा

मंसिर २५, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ७ गार्मा अनलाइन प्रणालीमार्फत नागरिकता सिफारिस सेवा सुरु गर्ने जिल्लाकै पहिलो वडा बनेको छ । बिहिबार अनलाइन प्रणालीमार्फत नागरिकता सिफारिस सेवा सुरु गरेसँगै सो वडा जिल्लाभरकै पहिलो बनेको हो । जिल्ला प्रशासन कार्यालयमा वडाबाट अनलाइनमार्फत नेपाली नागरिकताको सिफारिस गरिएको अनुसूची फारम अनुसार गार्माका स्थानीय दिपेश खत्रीलाई नागरिकता वितरण गरिएको छ ।

सो अवसरमा नागरिकता वितरण तथा अभिलेख व्यवस्थापनलाई थप व्यवस्थित र प्रविधिमा आधारित बनाउने उद्देश्य राखिएको बताइएको छ । सहायक प्रमुख जिल्ला अधिकारी सुरेन्द्र थापाका अनुसार, सोलुदुधकुण्ड नगरपालिका र नेचासल्यान गाउँपालिकाबाट मंसिर २८ गतेदेखि तथा अन्य पालिकाहरुबाट पौष १ गतेदेखि क्रमशः अनलाइनमार्फत नागरिकता सिफारिस कार्य सुरु गरिनेछ ।

यस प्रणालीबाट हाल नयाँ नागरिकतामात्रै सिफारिस गर्न सकिने छ । यो नयाँ प्रणाली भएकाले सुरुमा कुनै जटिलता देखापरेमा माथिल्लो निकायलाई सुझाव दिने र त्यसलाई परिस्कृत गर्ने अवसर प्राप्त हुने उहाँले विश्वास व्यक्त गर्नुभयो ।

यस्तै वडा अध्यक्ष सोनाम ग्याल्जेन शेर्पाले अनलाइन सेवा सञ्चालनमा आएसँगै स्थानीयहरूले वडामा लामो समय कुर्नुपर्ने झन्झटबाट मुक्त हुने र सार्वजनिक सेवामा पहुँच सहज हुने बताउनुभयो । यसअघि ‘म्यानुअल’ प्रणालीमार्फत उपलब्ध गराइँदै आएको सेवा अब पूर्ण रूपमा डिजिटल माध्यमबाट उपलब्ध हुनेछ । गार्मा वडा यसअघि नै जिल्लाकै पहिलो बालमैत्री वडाको रुपमा घोषणा भइसकेको छ ।