महाकुलुङ आधारभूत अस्पताल भवनको उद्घाटन

मंसिर २६, सोलुखुम्बु । सोलुखुम्बुको महाकुलुङ गाउँपालिका–१, बुङ स्थित १५ शैयाको महाकुलुङ आधारभूत अस्पताल भवनको उद्घाटन गरिएको छ । नयाँ भवनको उद्घाटन कोसी प्रदेशसभा सदस्य गोम्बु शेर्पा ‘कज्र्याङ’ को प्रमुख आतिथ्यतामा भवन उद्घाटन गरिएको हो ।

उक्त कार्यक्रममा जिल्ला समन्वय समितिका प्रमुख कृष्ण प्रसाद निरौला, सोलुदुधकुण्ड नगरपालिकाका मेयर नाम्गेल जाङ्बु शेर्पा, थुलुङ दुधकोशी गाउँपालिका अध्यक्ष असिम राई अन्य जनप्रनिधि, कर्मचारी, विभिन्न संघ संस्थाका प्रतिनिधी, सुरक्षाकर्मी लगायत स्थानीयहरुको उपस्थित रहको छ । सोही अवसरमा मानसिक स्वास्थ्य र पर्यटन प्रर्वधनका लागि साङ्गीतिक कार्यक्रमको समेत आयोजना गरिएको छ ।

दिउँसो भवन उद्घाटन कार्यक्रम भइरहेको छ भने साँझ सांगितिक कार्यक्रम हुने गाउँपालिका अध्यक्ष सूर्य कुलुङले जानकारी दिनुभएको छ । कार्यक्रममा राई इज किङ राजेश पायल राई, कमल खत्री, बबिना किराँती, कुमार प्रयास, अजय अलङ्कार, तथा हास्य कलाकार सुबोध गौतम र उमेश राई (फुलन्देकी आमा) ले प्रस्तुति दिने छन् ।

महाकुलुङ गाउँपालिकाका अध्यक्ष सूर्य बहादुर कुलुङका अनुसार गायक–गायिका राजेश पायल राई, बबिना किराँती र अजय अलङ्कार महाकुलुङ पालिकाका “गानका गायक र गायिका” भएकाले सो अवसरमा विशेष सम्मान प्रदान गरिनेछ । साथै, अस्पताल निर्माणका लागि जग्गा उपलब्ध गराउने जग्गादातालाई पनि सम्मान गर्ने कार्यक्रम रहेको छ । कार्यक्रमका लागि राजेशपायल राई सहितका कालाकार महाकुलुङ पुगि सकेको कार्यक्रम संयोजकले बताएका छन् ।