आधारभूत अस्पताल सञ्चालनमा आएसँगै महाकुलुङले ठूलो उपलब्धि पायो : नगरप्रमुख शेर्पा

मंसिर २६, सोलुखुम्बु । सोलुखुम्बुको सोलुदुधकुण्ड नगरपालिकाका नगरप्रमुख नाम्गेल जाङ्बु शेर्पाले महाकुलुङ आधारभूत अस्पताल सञ्चालनमा आएसँगै महाकुलुङ क्षेत्रले महत्वपूर्ण उपलब्धि हासिल गरेको बताउनुभयो । शुक्रबार अस्पताल भवन उद्घाटन समारोहलाई सम्बोधन गर्दै उहाँले यस्तो बताउनु भएको हो ।

मेयर शेर्पाले अब अस्पताल भवन निर्माण सम्पन्न भइसकेकाले गुणस्तरीय स्वास्थ्य सेवा प्रदान गर्न ध्यान केन्द्रित गर्नुपर्ने आवश्यकता रहेको उल्लेख गर्नुभयो । उहाँले अस्पतालले निरन्तर र प्रभावकारी सेवा सञ्चालन गर्न सघाउ पुग्न सबैको सहकार्य महत्त्वपूर्ण हुने बताउनुभयो ।

यस्तै मेयर शेर्पाले अस्पताल निर्माण प्रक्रियामा महत्त्वपूर्ण भूमिका निभाउने नेता सूर्य कुलुङको योगदानलाई विशेष रूपमा स्मरण गर्दै महाकुलुङको इतिहास रच्ने कार्यमा सूर्य कुलुङ अग्रपंक्तिमा रहेको बताउनुभयो । अस्पताल भवन उद्घाटनसँगै महाकुलुङ क्षेत्रका नागरिकले आधारभूत स्वास्थ्य सेवामा सहज पहुँच पाउने अपेक्षा गरिएको छ ।