बिराटनगर, मंसिर २६ । बिराटनगरमा बहुक्षेत्रीय पोषण योजना अन्तर्गत कोशी प्रदेशस्तरीय समिक्षा कार्यक्रम सम्पन्न भएको छ । प्रदेश योजना आयोग बिराटनगर, कोशी प्रदेशको आयोजनामा बहुक्षेत्रीय पोषण योजना अन्तर्गत आर्थिक वर्ष २०८१÷०८२ को प्रदेशस्तरीय समीक्षा कार्यक्रम शुक्रबार सम्पन्न भएको हो ।
बिहिबारबाट सुरु भएको कार्यक्रम युरोपियन युनियनको आर्थिक सहयोग तथा नेपाल सरकारको समन्वयमा संचालित सुनौलो हजार दिन कार्यक्रम मार्फत आमा, बालबालिका र किशोरीहरूको पोषण तथा स्वास्थ्य क्षेत्रमा परिवर्तनमुखी कार्यहरु भइरहेका छन् । दिगो विकास लक्ष्यअनुसार सन २०३० भित्र नेपाललाई ‘पोषणमैत्री राष्ट्र’ घोषणा गर्ने उद्देश्यका साथ संघीय मामिला तथा सामान्य प्रशासन मन्त्रालयले यस कार्यक्रमलाई नेतृत्व दिँदै आएको छ ।
नेपालभर सञ्चालन हुँदै आएको बहुक्षेत्रीय पोषण योजना (एमएसएनपी) कुपोषण अन्त्यका लागि प्रभावकारी पोषण सेवा उपलब्ध गराउने र मानव जीवनचक्रभरि पोषणको अवस्था सुधार गर्ने लक्ष्यका साथ कार्यान्वयन भइरहेको छ । यसअन्तर्गत पोषण विशेष तथा पोषण संवेदनशील कार्यक्रम पूर्ण र आंशिक प्याकेज गरी दुई खण्डमा सञ्चालन भइरहेका छन् ।
कार्यक्रमको अध्यक्षता स्वास्थ्य तथा पोषण क्षेत्र हेर्ने कोशी प्रदेश योजना आयोगका सदस्य नारायण कोईरालाले गर्नुभएको थियो । समापन कार्यक्रममा बोल्दै आयोगका उपाध्यक्ष कोईरालाले स्थानीय तहमा सञ्चालन भइरहेका पोषण कार्यक्रमहरूलाई प्रभावकारी बनाउन पोषण सहजकर्ताहरूले अझ सक्रियताका साथ आफ्नो भूमिका निर्वाह गर्नुपर्नेमा जोड दिनुभयो ।
उहाँले कार्यक्रमका लक्ष्यहरू प्राप्तिका लागि निरन्तरता, प्रतिबद्धता र समन्वय अत्यावश्यक रहेकोसमेत उल्लेख गर्नुभयो । कार्यक्रम सफलतापूर्वक सम्पन्नसँगै प्रदेशभर पोषण अभिवृद्धि सम्बन्धी गतिविधिलाई अझ सुदृढ बनाउने अपेक्षा गरिएको छ ।
उक्त कार्यक्रममा प्रदेशका उपाध्यक्ष तारानाथ निरौला, बिषयगत मन्त्रालयका मन्त्री तथा मन्त्रालयका प्रतिनिधिहरू, कोशी प्रदेशका पाँचथर, उदयपुर र खोटाङका २६ स्थानीय तहका पोषण सहजकर्ता तथा अन्य जिल्लाका पोषण सम्पर्क व्यक्तिहरुको उल्लेखनीय उपस्थिति रहेको सहकर्मी ठबिन्द्र मगरले जानकारी दिनुभयो ।
Discussion about this post