सोलुखुम्बु मासुमा आत्मनिर्भर, उत्पादन र खपत दुवै बढ्दो

सबिना राई, मंसिर २८, सोलुखुम्बु । सोलुखुम्बु जिल्ला मासु उत्पादनमा आत्मनिर्भर बनेको छ । भेटेरिनरी अस्पताल तथा पशु सेवा विज्ञ केन्द्र सोलुखुम्बुका अनुसार खसी–बोका, राँगा, बंगुर लगायतका पशुजन्य उत्पादनमा जिल्ला आत्मनिर्भर अवस्थामा पुगेको हो ।

कार्यालयको तथ्यांक अनुसार जिल्लामा वार्षिक २ हजार ४ सय ५४ मेट्रिक टन मासु उत्पादन हुँदै आएको छ । पछिल्ला वर्षहरूमा मासुको खपत दैनिक रूपमा बढ्दै गएको व्यवसायीहरू बताउँछन् । सोलुखुम्बु उद्योग वाणिज्य संघले निर्धारण गरेको मूल्य अनुसार हाल जिल्लामा खसीको मासु प्रतिकेजी १ हजार १ सय रुपैयाँ, ब्रोइलर कुखुरा प्रतिकेजी ५ सय रुपैयाँ, प्यारेन्ट कुखुरा प्रतिकेजी ६ सय रुपैयाँ, राँगाको फलमासु प्रतिकेजी ५ सय ५५ रुपैयाँ र सुँगुरको मासु प्रतिकेजी ६ सय रुपैयाँमा बिक्री भइरहेको उद्योग वाणिज्य संघ सोलुखुम्बुका अध्यक्ष रामलाल श्रेष्ठले जानकारी दिनुभयो ।

भेटेरिनरी अस्पताल तथा पशु सेवा विज्ञ केन्द्र सोलुखुम्बुका सूचना अधिकारी उदय नारायण यादवका अनुसार आर्थिक वर्ष २०८१/०८२ मा मात्र २ हजार ४ सय ५४ क्विन्टल मासु उत्पादन भएको बताउनुभयो । स्थानीय स्तरमा पनि पशुपालन व्यवसाय फस्टाउँदै गएको छ । सोलुदुधकुण्ड नगरपालिका वडा नम्बर ६ दोर्पुका इन्द्रकुमार श्रेष्ठले गत आइतबार मात्रै १० वटा खसी बिक्री गरेको बताउनुभयो ।

मंसिर महिना विवाहको सिजन भएकाले खसीको माग र बिक्री दुवै राम्रो हुने गरेको उहाँको भनाइ छ । उहाँका अनुसार पहिले प्रतिधार्नी ५० रुपैयाँमा बिक्री हुने मासु अहिले प्रतिकेजी १ हजार १ सय रुपैयाँसम्म पुगेको छ । यस्तै माप्य दुधकोशी गाउँपालिका वडा नम्बर ५ का कान्छा तामाङ रोजगारीका लागि दुई वर्ष ओमानमा काम गरेर फर्किएपछि खसी पालन तथा व्यापारमा लाग्नुभएको छ । करिब ६ वर्षदेखि यो व्यवसाय गर्दै आउनुभएका तामाङले विदेशमा दिन–रात खटिनुभन्दा नेपालमै खसी व्यापार गर्दा राम्रो आम्दानी हुने भएकाले यही पेशामा रमाएको बताउनुभयो ।