एनआइसी एसिया क्यापिटलद्वारा सोलुखुम्बुमा लगानी सचेतना कार्यक्रम, २०० बढीकाे सहभागिता

पौष १, सोलुखुम्बु ।   एनआइसी एसिया क्यापिटल लिमिटेडद्वारा सोलुखुम्बु जिल्लामा लगानी सचेतना तथा वित्तीय साक्षरता सम्बन्धी कार्यक्रम सम्पन्न भएको छ । विश्व लगानी सप्ताह २०२५ को अवसरमा आयोजना गरिएको उक्त कार्यक्रममा लगानीसम्बन्धी आधारभूतदेखि व्यवहारिक विषयमा जानकारी प्रदान गरिएको थियो ।

एनआइसी एसिया क्यापिटल लिमिटेड, काठमाडौंबाट आएका उच्च व्यवस्थापन तहका पदाधिकारीहरूले सोलुखुम्बु बहुमुखी क्याम्पस तथा सेजोङ कोरियन भाषा इन्स्टिच्युट, सल्लेरीमा अध्ययनरत विद्यार्थीहरूलाई लक्षित गरी कार्यक्रम सञ्चालन गरेका हुन् । कार्यक्रमको सहजीकरण तथा प्रशिक्षण एनआइसी एसिया क्यापिटलका विनोद चौलागाई र सन्जिव श्रेष्ठले गर्नुभएको थियो ।

कार्यक्रमका क्रममा सहभागी विद्यार्थी तथा विभिन्न संघ–संस्थामा आवद्ध सर्वसाधारणलाई डिम्याट खाता खोल्ने प्रक्रिया, प्राथमिक शेयर (आईपीओ), धितोपत्रको दोस्रो बजार, मुद्रा बजारका उपकरणहरू, सामूहिक लगानी कोष तथा दोस्रो बजारमा सूचिकृत कम्पनीहरूमा कहिले र कसरी लगानी गर्ने भन्ने विषयमा विस्तृत जानकारी प्रदान गरिएको थियो ।

साथै लगानी गर्दा ध्यान दिनुपर्ने आधारभूत पक्षहरू, जोखिम व्यवस्थापनका उपायहरू तथा पछिल्लो समयको शेयर बजारको अवस्था र प्रवृत्तिबारे पनि प्रशिक्षकहरूले स्पष्ट पारेका थिए ।

कार्यक्रममा सहभागी सोलुखुम्बु बहुमुखी क्याम्पसकी विद्यार्थी करिश्मा बस्नेतले यस्ता लगानी सचेतना कार्यक्रमहरू अत्यन्तै लाभदायक भएको बताउँदै आफूजस्ता विद्यार्थीहरूका लागि व्यवहारिक ज्ञान हासिल गर्ने राम्रो अवसर भएको प्रतिक्रिया दिइन् । उनले भनिन्, “सामान्य रूपमा शेयर बजार र लगानीका विषय जटिल लाग्थे, तर यस कार्यक्रमपछि डिम्याट खाता, आईपीओ र दोस्रो बजारका बारेमा स्पष्ट बुझ्न पायौं । यस्तो कार्यक्रमले भविष्यमा सही निर्णय लिन सहयोग पुग्छ ।”

त्यसैगरी कार्यक्रममा सहभागी अन्य विद्यार्थीहरूले पनि लगानी तथा शेयर बजारसम्बन्धी व्यवहारिक ज्ञान प्राप्त गर्न पाएको भन्दै खुसी व्यक्त गरेका थिए । सहभागीहरूले यस्ता वित्तीय साक्षरता अभिवृद्धि गर्ने कार्यक्रमहरू आगामी दिनमा पनि निरन्तर रूपमा सञ्चालन गर्न माग गरेका छन् ।

एनआइसी एसिया क्यापिटल लिमिटेडले वित्तीय साक्षरता अभिवृद्धि गर्ने उद्देश्यले देशका विभिन्न स्थानमा यस्ता लगानी सचेतना कार्यक्रमहरू सञ्चालन गर्दै आएको जनाएको छ । ग्रामीण तथा शैक्षिक संस्थाहरूमा वित्तीय ज्ञान विस्तार गर्दै लगानी संस्कृतिको विकास गर्ने लक्ष्यसहित आगामी दिनहरूमा पनि यस्ता कार्यक्रमहरूलाई निरन्तरता दिने संस्थाले बताएको छ ।