सोलुखुम्बुमा नेपाली कम्युनिष्ट पार्टीको जिल्ला स्तरीय एकता भेला सकियो

पौष १, सोलुखुम्बु । नेपाली कम्युनिष्ट पार्टीको सोलुखुम्बु जिल्ला स्तरीय एकता सन्देश भेला तथा प्रशिक्षण कार्यक्रम सम्पन्न भएको छ । मंगलबार जिमी राई उत्थान समाज, सोलुखुम्बुको सभाहलमा औपचारिक कार्यक्रमका बीच उक्त भेला सम्पन्न भएको हो ।

कार्यक्रम नेपाली कम्युनिष्ट पार्टीका केन्द्रीय सदस्य अजम्बर कामबाङ्गको प्रमुख आतिथ्यतामा सम्पन्न भएको थियो । केन्द्रमा विभिन्न दलहरूको सहभागिता भए पनि सोलुखुम्बु जिल्लामा एकता भएका दलहरूमध्ये नेकपा (माओवादी केन्द्र) र नेकपा (एकीकृत समाजवादी) मात्रै रहेको हुँदा कार्यक्रममा यी दुई दलबीच एकता भएको जनाइएको छ । कार्यक्रममा एकता सन्देश प्रवाह गर्नुका साथै सहभागी पार्टी कार्यकर्ताहरूलाई प्रशिक्षणसमेत प्रदान गरिएको थियो ।

प्रशिक्षण दिने वक्ताहरूमा पार्टीका केन्द्रीय सदस्य अजम्बर कामबाङ्ग, पूर्व केन्द्रीय सदस्य शिवबहादुर बस्नेत तथा पूर्व केन्द्रीय सदस्य एवम् कोशी प्रदेश सभा सदस्य गोम्बु शेर्पा (कज्र्याङ) रहनुभएको थियो । यसैबीच, पालिका स्तरमा पनि एकता सन्देश तथा प्रशिक्षण कार्यक्रम सञ्चालन गरिने माओवादी केन्द्र सोलुखुम्बु जिल्ला संयोजक नाम्गेल शेर्पाले जानकारी दिनुभयो ।

उहाँका अनुसार नेचासल्यान गाउँपालिकामा पौष ४ गते, थुलुङ दूधकोशी गाउँपालिकामा पौष ५ गते, सोताङ गाउँपालिकामा पौष ६ गते, महाकुलुङ गाउँपालिकामा पौष ७ गते, सोलुदुधकुण्ड नगरपालिकामा पौष ८ गते तथा माप्य दूधकोशी गाउँपालिकामा पौष ९ गते कार्यक्रम आयोजना गरिनेछ ।

कार्यक्रममा जिल्लाबाट प्रतिनिधित्व गर्ने दुबै दलका केन्द्रीय समिति सदस्यहरू, केन्द्रीय सल्लाहकारहरू, केन्द्रीय आयोग तथा निकायका सदस्यहरू, प्रदेश कमिटी सदस्यहरू, प्रदेश सल्लाहकारहरू, जिल्ला समन्वय समिति सदस्यहरू, नगर तथा पालिका कमिटीका पदाधिकारी तथा सदस्यहरूको उल्लेखनीय उपस्थिति रहेको थियो ।