दिक्तेल इङ्लिस बोर्डिङको विजय उत्सव, नगद राशिसहित प्रशिक्षक र खेलाडी सम्मान

अशोक साम्पाङ, खोटाङ । राष्ट्रपति रनिङ सिल्ड प्रतियोगितामा प्रथम स्थान हासिल गरेपछि खोटाङस्थित दिक्तेल इङ्लिस सेकण्डरी बोर्डिङ स्कुलले विजय उत्सव मनाएको छ । १६ औँ राष्ट्रपति रनिङ सिल्ड प्रतियोगिता अन्तर्गत चौथो दिक्तेल रुपाकोट मझुवागढी नगरपालिका स्तरीय अन्तर माध्यमिक विद्यालय राष्ट्रपति रनिङ सिल्डमा प्रथम बनेको विद्यालयले मंगलबार सदरमुकाम दिक्तेलबजारमा विजय उत्सव आयोजना गरेको हो ।

विद्यालयले प्रशिक्षक तथा विद्यार्थी खेलाडीहरूलाई विद्यालय प्राङ्गणमा सम्मान गर्दै नगद राशि प्रदान गरेको थियो । विद्यालयका शिक्षिका सतिना डंगोलका अनुसार गोल्ड मेडलिस्ट ४२ जना खेलाडीलाई एक–एक हजार रुपैयाँका दरले नगद पुरस्कार प्रदान गरिएको छ भने नगर उत्कृष्ट खेलाडी रोशन बराललाई थप ५ हजार रुपैयाँ प्रदान गरिएको छ । सम्मान कार्यक्रमपछि विद्यालयदेखि दिक्तेल बजारको मुख्य सडक हुँदै रत्नपार्क, अल्छेढुंगा, लोकसेवा हुँदै भवन गैरा, अस्पताल चोक, अदालत, हाटडाँडा हुँदै पुनः बजार सडकबाट विद्यालय परिसरसम्म सिल्ड, ट्रफी तथा मेडलको प्रदर्शनीसहित विजय ¥याली निकालिएको थियो ।

विजय ¥यालीमा सहभागी शिक्षक तथा विद्यार्थीहरूलाई बाटो–बाटोमा अभिभावक तथा स्थानीयवासीहरूले फूलमाला लगाइदिँदै बधाई तथा शुभकामना व्यक्त गरेका थिए, जसले उत्सवलाई थप उल्लासपूर्ण बनाएको थियो । प्रधानाध्यापक धनकर्ण श्रेष्ठका अनुसार विद्यालय जिल्लाकै शैक्षिक क्षेत्रमा अब्बल रहनुका साथै खेलकुद क्षेत्रमा पनि निरन्तर चासो, हौसला र विधागत प्रशिक्षकको व्यवस्थाका कारण उल्लेखनीय सफलता हासिल गर्न सफल भएको हो ।

राष्ट्रपति रनिङ सिल्ड प्रतियोगितामा विद्यालयले कूल ५६ पदकमध्ये २६ स्वर्ण, १८ रजत र १२ कास्य पदक जितेको छ । पदक विवरण अनुसार एथलेटिक्सतर्फ ८ स्वर्ण ४ रजत र ६ कास्य, मार्सल आर्टतर्फ १६ स्वर्ण, ८ रजत र १२ कास्य तथा कबड्डीतर्फ छात्र–छात्रा गरी २ स्वर्ण पदक विद्यालयले प्राप्त गरेको छ ।

गत वर्ष पनि दिक्तेल इङ्लिस सेकण्डरी बोर्डिङ स्कुलले १८ स्वर्ण, १८ रजत र १९ कास्य पदक जित्दै राष्ट्रपति रनिङ सिल्डको उपाधि उचाल्न सफल भएको थियो । यस वर्षको राष्ट्रपति रनिङ सिल्ड प्रतियोगितामा नगरभित्रका २३ वटा माध्यमिक विद्यालय, २ वटा आधारभूत विद्यालय र दिक्तेल बहुमुखी क्याम्पससहित कुल २६ वटा शैक्षिक संस्थाको सहभागिता रहेको थियो ।