सगरमाथासहित हिमाल सफाइका लागि नयाँ पाँच वर्षे कार्यविधि स्वीकृत

पौष २, सोलुखुम्बु । संस्कृति, पर्यटन तथा नागरिक उड्डयनमन्त्री अनिलकुमार सिन्हाले सगरमाथा केन्द्रित नयाँ पाँच वर्षे हिमाल सफाइ कार्यविधि (२०८२–२०८६) स्वीकृत गरेका छन्। सर्वोच्च अदालतको सगरमाथा सफाइसम्बन्धी परमादेशअनुसार पर्यटन मन्त्रालयले तयार पारेको यो कार्यविधि मन्त्री सिन्हाको पदबहालीपछिको पहिलो निर्णय हो। नयाँ कार्यविधिअनुसार सगरमाथासहित ८ हजार मिटरभन्दा अग्ला हिमालमा आरोहीहरूले छोड्ने फोहोर र मलमूत्र अनिवार्य रूपमा संकलन र व्यवस्थापन गरिनेछ।

आरोहीले फोहोर फर्काउनुपर्ने, पुप ब्यागको प्रयोग, फोहोर वर्गीकरण, प्रशोधन र निष्कासनका लागि आवश्यक पूर्वाधार सुनिश्चित गरिने व्यवस्था गरिएको छ। यसमा नेपाली सेना, स्थानीय तह, गैरसरकारी संस्था र आरोहीहरूको प्रत्यक्ष सहभागिता, उचित पारिश्रमिक र बिमाको व्यवस्था पनि समेटिएको छ। नेपाल सरकारले सन् २०१९ देखि नेपाली सेनाको नेतृत्वमा सफा हिमाल अभियान सञ्चालन गर्दै आएको छ।

२०१९–२०२४ बीच सगरमाथासहितका हिमालबाट १,१९,०५६ केजी फोहोर र १२ मानव शव संकलन गरिएको थियो। हाल खुम्बु क्षेत्रमा प्रदूषण नियन्त्रण समिति र शेर्पा समुदायको सहकार्यमा फोहोर व्यवस्थापन भइरहेको छ। कार्यविधिले सगरमाथाको जैविक विविधता, हिमनदी र वातावरणीय स्वच्छता जोगाउन समुदायस्तरमा सचेतना कार्यक्रमसमेत समावेश गरेको छ। सरकारले आगामी पाँच वर्षमा सगरमाथा सफाइ अभियानलाई दिगो र प्रभावकारी बनाउने लक्ष्य लिएको जनाएको छ ।