गत वर्षको तुलनामा सोलुखुम्बुमा यस वर्ष स्याउ उत्पादनमा वृद्धि

पौष ९, सोलुखुम्बु । हिमाली जिल्ला सोलुखुम्बुमा स्याउ उत्पादनमा वृद्धि भएको छ । खेतीयोग्य क्षेत्रफलको विस्तार, उन्नत जातको प्रयोग सँगै जिल्लामा स्याउ उत्पादनमा वृद्धि भएको कृषि ज्ञान केन्द्र सोलुखुम्बुका सूचना अधिकारी उपेन्द्र ठाकुरले जानकारी दिनुभयो ।

उहाँका अनुसार गत आर्थिक वर्ष २०८१/८२ मा जिल्लामा स्याउ खेतीको कुल क्षेत्रफल २ सय ३४ दशमलव ५० हेक्टर मध्ये उत्पादनयोग्य २ सय ३० हेक्टरबाट १ हजार ३ सय ८६ मेट्रिक टन स्याउ उत्पादन भएको थियो । यस्तै चालु आर्थिक वर्ष २०८२/८३ मा स्याउ खेतीको क्षेत्रफल बढेर २ सय ३९ हेक्टर पुगेको छ, भने उत्पादनयोग्य २ सय ३२ हेक्टरबाट १ हजार ३ सय ८८ मेट्रिक टन स्याउ उत्पादन भएको हो ।

कृषि ज्ञान केन्द्रका अनुसार पछिल्ला वर्षयता सोलुखुम्बुमा स्याउ उत्पादनमा उत्साहजनक सुधार देखिएको छ । जिल्लामा व्यावसायिक रूपमा रेड डेलिसियस, गोल्डेन डेलिसियस लगायत जातका स्याउ उत्पादन हुँदै आएको सूचना अधिकारी ठाकुरले जानकारी दिनुभयो । यहाँ उत्पादन भएका स्याउहरू जिल्लाका विभिन्न स्थान साथै अन्य जिल्लामा समेत पुग्ने गरेको छ ।