अशोक साम्पाङ, खोटाङ । खोटाङको दिक्तेल रुपाकोट मझुवागढी नगरपालिका–१३ नुनथलामा लामो तथा छोटो दूरीमा चल्ने सवारी साधनका चालक तथा सहचालकहरूको स्वास्थ्य परीक्षण गरिएको छ । मध्यपहाडी लोकमार्ग अन्तर्गत नुनथलामा आयोजित उक्त स्वास्थ्य शिविर जिल्ला ट्राफिक प्रहरी कार्यालय दिक्तेल र प्रहरी चौकी नुनथलाको संयुक्त आयोजनामा सम्पन्न भएको हो । शिविरमा स्वास्थ्य चौकी नुनथलाका प्रमुख दिपेश श्रेष्ठको सक्रिय सहभागिता रहेको थियो । स्वास्थ्य परीक्षणका क्रममा सवारी चालक तथा सहचालकहरूको रक्तचाप (प्रेसर) जाँचका साथै लापसे (लागूपदार्थ सेवन) तथा मापसे (मादक पदार्थ सेवन) सम्बन्धी परीक्षण गरिएको थियो । जिल्ला ट्राफिक प्रहरी कार्यालय दिक्तेलका प्रहरी सहायक निरीक्षक बाबुराम नेउपाने तथा प्रहरी चौकी नुनथलाका प्रमुख प्रहरी सहायक निरीक्षक पर्सुराम तामाङको नेतृत्वमा शिविर सञ्चालन गरिएको हो । शिविरको उद्देश्य सवारी दुर्घटना न्यूनीकरण गर्दै सुरक्षित यात्रालाई प्रवद्र्धन गर्नु रहेको जनाइएको छ । सो अवसरमा करिब एक सय जना सवारी चालक तथा सहचालकहरूको स्वास्थ्य परीक्षण गरिएको थियो ।
यसैबीच, जिल्ला ट्राफिक प्रहरी कार्यालय दिक्तेलले चालु महिना भित्र गरेका विभिन्न गतिविधिहरूबारे जानकारी दिएको छ । कार्यालयका अनुसार बढी दुर्घटना हुने स्थानहरूमा चेतनामूलक बोर्डहरू राखिएको छ भने सवारी दुर्घटना न्यूनीकरणका लागि सचेतनामूलक कार्यक्रमहरू समेत सञ्चालन गरिएको छ ।
त्यसैगरी, जिल्ला ट्राफिक प्रहरी कार्यालय दिक्तेलका प्रहरी सहायक निरीक्षक बाबुराम नेउपानेको नेतृत्वमा दैनिक रूपमा लामो तथा छोटो दूरीमा सञ्चालन हुने सवारी साधनहरूको सिट क्षमता, भाडादर, सवारीको अवस्था तथा चालकको शारीरिक र मानसिक अवस्था समेत नियमित रूपमा जाँच गर्ने कार्य भइरहेको जानकारी प्राप्त भएको छ ।
त्यसैगरी पुष ४ गते साँझ करिब ६ः३० बजे दिक्तेल रुपाकोट मझुवागढी नगरपालिका–२ सोल्मामा मोटरसाइकल दुर्घटना भएको सूचना प्राप्त हुनासाथ जिल्ला प्रहरी कार्यालय र जिल्ला ट्राफिक प्रहरी कार्यालयको संयुक्त टोली तत्काल घटनास्थलमा खटिएको थियो । दुर्घटनामा घाइते भएका दिक्तेल रुपाकोट मझुवागढी नगरपालिका–४ निवासी अन्दाजी ५५ वर्षका पदम बहादुर खड्कालाई करिब १५० मिटर तल खोलाबाट उद्धार गरी उपचारका लागि पठाइएको प्रहरीले जनाएको छ ।
त्यसैगरी, ट्राफिक प्रहरीले सवारी साधनबाट अनावश्यक ध्वनि प्रदूषण गर्ने गरी प्रेसर हर्न बजाउने सवारी साधनहरूका प्रेसर हर्न हटाउने कार्य गर्दै ध्वनि प्रदूषण नियन्त्रणमा समेत सक्रियता बढाएको जनाएको छ ।
Discussion about this post