पौष १०, सोलुखुम्बु । सोलुखुम्बुको खुम्बु पासाङल्हामु गाउँपालिका अन्तर्गत पर्ने ङिम दोर्जी शेर्पा पर्यटन सडक खण्डमा पर्ने सुर्के–नासागारा क्षेत्रको पुरानो मूल बाटो सडक खन्ने क्रममा अवरुद्ध भएपछि हाल आवतजावत पूर्ण रूपमा बन्द गरिएको छ ।
गाउँपालिकाका अनुसार सडक विस्तार तथा निर्माण कार्यका क्रममा पुरानो बाटो प्रयोगयोग्य नरहेकाले नासागारा नपुग्दासम्म खच्चडसहित अन्य विभिन्न पशु चौपायको आवतजावत पूर्ण रूपमा रोक लगाइएको छ । यस अवधिमा यात्रु तथा सेवाग्राहीहरूलाई वैकल्पिक बाटो प्रयोग गर्न गाउँपालिकाले आग्रह गरेको छ ।
खुम्बु पासाङल्हामु गाउँपालिकाका प्रमुख प्रशासकीय अधिकृत सुजन कुमार बुढाथोकीले पैदल यात्री तथा भरियाहरूले पनि सडक खन्ने कार्यमा संलग्न निर्माण व्यवसायीसँग समन्वय गरेर मात्र आवतजावत गर्नुपर्ने जानकारी दिनुभयो ।
उहाँका अनुसार सुरक्षालाई ध्यानमा राख्दै निर्माण कार्य भइरहेको क्षेत्रमा बिना समन्वय हिँडडुल नगर्न अनुरोध गरिएको छ। सडक निर्माण कार्य सम्पन्न भएपछि आवतजावत पुनः सहज हुने गाउँपालिकाले जनाएको छ ।
Discussion about this post