सोलुखुम्बुमा क्रिसमस डे भव्य रूपमा मनाइँदै

पौष १०, सोलुखुम्बु । क्रिश्चियन धर्मका संस्थापक येशु ख्रीष्टको जन्मदिनको सम्झनामा आज सोलुखुम्बुमा क्रिश्चियन समुदायले क्रिसमस डे भव्यताका साथ मनाइरहेका छन् । जिल्लाका विभिन्न चर्च तथा मण्डलीहरूमा विशेष प्रार्थना कार्यक्रम आयोजना गरी शुभकामना आदान–प्रदान गरिएको छ। क्रिसमसको अवसरमा चर्चहरू सजाइएका छन् भने समुदायका सदस्यहरू एक–आपसमा भेटघाट गर्दै पर्वको खुसी साटासाट गरिरहेका छन्।

आजभन्दा करिब दुई हजार २५ वर्षअघि डिसेम्बर २५ तारिखका दिन येशु ख्रीष्टको जन्म इजरायलको वेथलेहेममा भएको विश्वास गरिन्छ। विश्वभरका धेरै देशमा उत्साहका साथ मनाइने क्रिसमस दिवस नेपालमा भने २०६३ सालपछि महोत्सवको रूपमा मनाउन थालिएको हो।

नेपाल सरकारले २०६३ सालदेखि २०७४ सालसम्म क्रिसमस डेमा सार्वजनिक बिदा दिएको थियो। २०७५ सालदेखि २०७७ सालसम्म क्रिश्चियन धर्मावलम्बीलाई मात्र बिदा दिइएकोमा २०७८ सालदेखि पुनः सबै नागरिकका लागि सार्वजनिक बिदा दिइँदै आएको छ। क्रिसमस पर्वले आपसी प्रेम, शान्ति र सद्भावको सन्देश फैलाउने विश्वास लिइएको छ।