देउसामा खानेपानी समस्या समाधानतर्फ ठोस कदम

पौष ११, सोलुखुम्बु । सोलुखुम्बुको थुलुङ दुधकोशी गाउँपालिका वडा नम्बर ७ देउसा क्षेत्रमा वर्षौँदेखि चल्दै आएको खानेपानी अभाव अन्त्य हुने संकेत देखिएको छ । ‘एक टोल एक मुहान, एक घर एक धारा’ अभियान अन्तर्गत घर–घरमा धारा निर्माणको काम सुरु भएपछि स्थानीयवासीमा नयाँ आशा पलाएको छ । चालु आर्थिक वर्षमा विनियोजित बजेट प्रयोग गरी वडा कार्यालयको समन्वयमा झरेनी, साउने, फोक्सा, जालिम, रोक्ति र बोगल क्षेत्रका बासिन्दालाई धारा निर्माणका लागि आवश्यक सामाग्री वितरण गरिएको छ ।

वडा अध्यक्ष भोजराज कार्कीका अनुसार अभियान अन्तर्गत प्रत्येक घरमा मिटर जडित पक्की धारा जडान गरिनेछ, जसले पानीको दुरुपयोग नियन्त्रण गर्नुका साथै दीगो व्यवस्थापनमा सहयोग पुग्नेछ । स्थानीय बासिन्दाले यस अभियानले स्वास्थ्य, सरसफाइ र समय व्यवस्थापनमा ठूलो परिवर्तन ल्याउने विश्वास व्यक्त गरेका छन् । विकासका आधारभूत आवश्यकतामध्ये खानेपानीलाई प्राथमिकतामा राखेर अघि बढाइएको यो अभियान देउसाका लागि मात्र नभई अन्य ग्रामीण बस्तीका लागि पनि उदाहरणीय बन्ने देखिएको छ ।