सबै मिलेर बनाएको देश हेर्न चाहन्छु : हर्क साम्पाङ

पौष ११, सोलुखुम्बु । श्रम संस्कृति पार्टीका केन्द्रीय अध्यक्ष हर्कराज राई ‘हर्क साम्पाङ’ले सबै नागरिकको सहभागितामा बनेको देश हेर्ने इच्छा व्यक्त गर्नुभएको छ । शुक्रबार सोलुखुम्बुको सदरमुकाम सल्लेरीमा आयोजित बृहत् आमसभालाई सम्बोधन गर्दै उहाँले यस्तो बताउनुभएको हो ।

आगामी फागुन २१ गते हुने प्रतिनिधि सभा निर्वाचनमा हाम्रो होइन, राम्रोलाई भोट दिन सोलुखुम्बुबासीलाई आग्रह गर्दै अध्यक्ष साम्पाङले आफ्नो पार्टीले कुनै पनि दलसँग गठबन्धन नगरी एक्लै चुनाव लड्ने स्पष्ट पार्नुभयो । सम्बोधनका क्रममा अध्यक्ष साम्पाङले गत भदौ २३ र २४ गते भएको जेनजी आन्दोलनमा दुई प्रकारका जेनजी रहेको दाबी गर्नुभयो । उहाँका अनुसार एकथरी जेनजीले भ्रष्टाचार अन्त्यका लागि आवाज उठाएका थिए भने अर्कोथरी जेनजीले सिंहदरबार जलाउने जस्ता गतिविधि गरेको टिप्पणी गर्नुभयो ।

सोलुखुम्बुमा असली जेनजी युवाहरूको आवाज उठाउने उद्देश्यका साथ आफू जिल्ला आएको उहाँले बताउनुभयो । यस्तै, अध्यक्ष साम्पाङले भौतिक, ऊर्जा तथा शहरी विकास मन्त्री कुलमान घिसिङलाई एमसिसीबारे आफ्नो धारणा स्पष्ट गर्न चुनौती दिनुभयो ।

साथै राष्ट्रिय स्वतन्त्र पार्टीका सभापति रवि लामिछानेलाई जेनजी आन्दोलनका क्रममा किन कारागारबाट निस्किनुभयो र फेरि किन जानुभयो भन्दै प्रश्न गर्नुभयो । यस्तै काठमाडौं महानगरपालिकाका मेयर बालेन्द्र शाहप्रति समेत उहाँले टिप्पणी गर्दै आन्दोलनका बेला जेनजीलाई उकासेर पछि देश सम्हाल्ने समय आउँदा किन मौन बस्नुभयो भन्ने प्रश्न उठाउनुभयो । सल्लेरीमा आयोजित बृहत् आमसभाको अन्त्यमा अध्यक्ष साम्पाङले देशप्रतिको माया प्रकट गर्दै उपस्थित नागरिकहरूसँग सामूहिक रूपमा नाचेर कार्यक्रम समापन गर्नुभएको थियो ।