लिखु पिकेमा स्थानीय सीपमै रोजगारी सिर्जना गर्ने पहल, निःशुल्क तालिम हुने

पौष १२, सोलुखुम्बु । सोलुखुम्बुको लिखु पिके गाउँपालिकाले स्थानीय स्तरमै रोजगारी र आत्मनिर्भरता बढाउने लक्ष्यसहित निःशुल्क सिप विकास तालिम सञ्चालन गर्ने भएको छ । गाउँपालिकाले परम्परागत सीप र व्यावसायिक क्षमतालाई एकसाथ प्रवद्र्धन गर्ने उद्देश्यले दुई फरक प्रकृतिका तालिम सुरु गर्न लागेको हो ।

गाउँपालिका प्रमुख प्रशासकीय अधिकृत रमेश कुमार कार्कीका अनुसार आधारभूत ढाका बुनाइ तालिम तीन महिनासम्म सञ्चालन हुनेछ, जसमा १० जना सहभागी हुनेछन् । यस तालिमले विशेषगरी स्थानीय कच्चा पदार्थ र परम्परागत सीपलाई आम्दानीसँग जोड्ने अपेक्षा गरिएको छ । यस्तै, होटल तथा खाद्य सेवा क्षेत्रमा रोजगारीको सम्भावना बढाउने उद्देश्यले २० जनाका लागि एक महिनाको कुक तालिम सञ्चालन गरिनेछ ।

दुवै तालिम गाउँपालिकाभित्रै सञ्चालन गरिने भएकाले सहभागीलाई बाहिर जानुपर्ने बाध्यता नहुने गाउँपालिकाको भनाइ छ । स्थानीय युवायुवतीलाई सीप सिकाएर स्वरोजगारतर्फ उन्मुख गराउने तथा वैदेशिक रोजगारीमा जाने दबाब घटाउने दिशामा यो कार्यक्रम प्रभावकारी हुने अपेक्षा गरिएको छ ।