सोलुखुम्बुको सुन्तला उत्पादन ७ सय ८७ मेट्रिक टनले घट्यो

पौष १४, सोलुखुम्बु । हिमाली जिल्ला सोलुखुम्बुमा यस वर्ष सुन्तला उत्पादनमा उल्लेख्य कमी आएको छ । प्रतिकूल मौसमका कारण जिल्लाको सुन्तला उत्पादन प्रभावित भएको जिल्ला कृषि ज्ञानकेन्द्र सोलुखुम्बुले जनाएको छ । कृषि ज्ञान केन्द्रका अनुसार आर्थिक वर्ष २०८२/८३ मा जिल्लामा २ हजार ६२.६० मेट्रिक टन सुन्तला उत्पादन भएको छ ।

यो उत्पादन गत आर्थिक वर्ष २०८१/०८२ को तुलनामा ७ सय ८७.४७ मेट्रिक टनले कम हो । कृषि ज्ञानकेन्द्रका सूचना अधिकारी उपेन्द्र ठाकुरका अनुसार फल पाक्ने समयमा बर्षा, लामो खडेरी तथा चिसो मौसमका कारण सुन्तलाका बोटमा राम्रोसँग फूल र फल नलाग्दा उत्पादन घटेको हो । गत आर्थिक वर्ष २०८१/०८२ मा जिल्लामा २ हजार ८ सय ५०.०६ मेट्रिक टन सुन्तला उत्पादन भएको थियो ।

सो वर्ष फल दिने क्षेत्रफल २ सय ५८.८४ हेक्टर रहेको थियो भने सुन्तला लगाइएको कुल क्षेत्रफल २ सय ५९.०९ हेक्टर रहेको थियो । त्यतिबेला प्रतिहेक्टर ११.०१ मेट्रिक टन उत्पादकत्व कायम भएको कृषि ज्ञानकेन्द्रले जनाएको छ । उत्पादन भएको सुन्तला जिल्लाका स्थानीय बजारमै बिक्री हुँदै आएको छ । हाल सुन्तलाको मूल्य प्रतिकिलो १२० रुपैयाँदेखि २०० रुपैयाँसम्म रहेको छ । जिल्लाको खुम्बु पासाङ ल्हामु गाउँपालिका बाहेक अन्य स्थानीय तहहरूमा सुन्तला उत्पादन हुने गरेको छ ।